Variûi e faìnis, dôs bestiis cuntune brute innomine parcè che a ingrassin su lis disgraciis di chei altris, sui muarts e su lis robariis. Alc un grum dongje a ce che e fâs cierte stampe furlane, ancje se no je simpri furlane tal non e tal paron, cuant che denant di une disgracie, a ûs la montane di Vierse e Breçan dal an passât, e dopre une terminologjie gjeografiche… imprecise. O ben, falade, ma falade in mût sistemic: lis ploiis fuartis a searessin stadis “nel Friuli e nell’isontino”, o pûr “nel Friuli e nel goriziano”, in sumis, in Friûl e di cualchi altre bande, che po chê bande e sarès il Friûl a Jevât, ma no si à di clamâlu Friûl. Si profite, duncje, des disgraciis par fâ passâ sot vie la solite idee che Gurize no sarès in Friûl, si puarte indenant chê opare di defurlanizazion di Gurize che Nazzi al à contât tant ben.
◆ E cheste e je la malignitât piês: si pant ignorance propit cuant che si cjacare des disgraciis, cussì che cui che al proteste al fâs la figure dal fanatic, dal cinic, dal disinteressât, dal stupit, parcè che denant dai muarts si piert intai “cjampanilisms”. Si compuartin, chescj mieçs di informazion, come i laris ai funerâi, che a robin il tacuin ae parintât dal muart. E se magari il nevôt dal muart si vise che a son daûr a robâi il tacuin e al cride, la int i salte intor, parcè che invezit di pensâ al nono che al è muart al pense ai bêçs.
◆ Fin cumò al à rivât adore a restâ “del Friuli” dome il taramot. Cuissà che chest an, in ocasion dai cincuante agns, no scugnedin meti a miezis ancje chel. ❚
Disinformazion di regjim
Indrì Maiero
