DI SCJAS IN SCJAS: I TARAMOTS INTE STORIE FURLANE. Votcent. Austrie Italie: 3-3

Maledet Napoleon! A varan pensât al 24 di Otubar dal 1812 su le diestre dal Tiliment: che sigurementri i dams une vore pençs di Sant Cassian, Cjanive, Davian, Polcenic e Secuals saran stâts par vie di chel demoni che in chel an al jere daûr a stiçâ il Diaul in Russie. Dismovintlu ancjemò une volte sot de gruse de tiere. Dome a Secuals lis spesis di ricostruzion a forin paurosis: si pense a une cifre di 60.000 liris, che metudis insiemi a chês di Fane, 40.000, a fasevin un frac di beçons. E se a Pordenon a tirarin ju le tor dal Orloi, che no stave plui in pîts di bessole, a Cjavàs Gnûf trente fameis e restarin cence cjase: che in tun paisut di cualchi centenâr di abitants al vûl dî che e je vignude ju une cjase sì e che altre ancje.
E ai 6 di Otubar dal 1839? Darte, in Cjargne, e criche une vore fuart. La mont si prepare pal spetacul grant dal 1853: al è il 19 di Fevrâr cuant che une scosse su par ju dal 5.5 grât de scjale Richter e poche la Amariane. Fuarte, che le sintin a Trent e a Triest. Lis cronichis dai predis e son sioronis di particolârs, ma la testemoneance plui curiose e reste chê de int di Damâr: a son lis dîs di une buinore frede inglaçade, cun tun cîl net, di cristal, e il soreli: insome tante lûs, ma une temperadure di cricâ. Di colp al tache a neveâ: il scjas, grandonon, al à fat alçâ la nêf de spice plui alte de montagne, creant un nûl che biel planc si poie inte plane.
Trê taramots impuartants cuant che la Patrie e jere ancjemò sot de Austrie. Che e rivarà a gjestî la situazion in maniere serie, dant une grande responsabilitât a lis comunitâts periferichis, tal segnâl de fiducie e de autonomie. Ma visìnsi che il scjas plui grant dal secul, chel politic, al rive cul esercit talian, tal 1866, cent e cincuante agns fa. E i taramots che a vegnin dopo a àn pardabon une altre rispueste istituzionâl, magari cussì no: ai 14 di Mai dal 1872 al è Cividât a jessi colpît. In maniere lizere, ma simpri buine di tignî alte la pôre de int. Par un mês. E un biel scjas si è sintût ancje tal 1895, epicentri Lubiane.
Ma e je dome une cerce rispiet di chel plui impuartant dai 29 di Jugn dal 1873. Une sdrondenade fuartonone: si calcole il grât X de scjale Mercalli. Cussì e scrivarà le Gazete Uficiâl dal Ream d’Italie trê dîs dopo dal fat, ai 2 di Lui: nus contin che aes cinc di buinore al è stât regjistrât un Taramot di «rimarchevole intensità». E si preocupe ancje di zontâ: «Essa però non produsse alcun danno sensibile, all’infuori di qualche screpolatura avvenuta in alcune muraglie. Non ci furono danni gravi, per quanto sappiamo, neanche nel resto della provincia». Dut ben insome. Ma ce che al colpìs al è propite chel per quanto sappiamo, che scrit su di un sfuei uficiâl tant che la Gazete al somee coionâ il nestri teritori. Di chel moment in denant e je stade une specie di sigle che il Stât Talian nus à imponût.
O sin simpri stâts misteriôs pai gnûfs governants. Une int “per quanto ne sappiamo”; une culture “per quanto ne sappiamo”; une storie “per quanto ne sappiamo”. Vuê, che in tancj e celebrin le glorie dai cent e cincuante agns de anession al meretarès fâi câs: plui che une oportunitât une disgracie. Almancul “per quanto ne sappiamo”! ❚
✒ Agnul Floramo