DI BESSÔI – SCUELE. Prin di dut al ven il mestri

Coventino imprescj gnûfs par cheste gnove didatiche furlane? Forte par sigûr al è atent ai sussidis, “ma il prin imprest dal insegnament – al dîs – al è il mestri, no il libri o il computer”. Al covente prin di dut “che i docents a sedin formâts e inzornâts in continuo su chês che a son lis buinis pratichis e lis miôr esperiencis che a vegnin realizadis te scuele di ogni dì. E la nestre Regjon e à percors didatics pardabon sflandorôs che dut câs a laressin documentâts e spandûts sul teritori par rivâ a meiorâ simpri di plui la nestre pedagogjie. La formazion dai gnûfs docents e la formazion continue di chei che za a insegnin (parcè che ancje pai mestris “ogni mês si fâs la lune, ogni dì di impare une”) a permetin di mudâ l’insegnament intune riflession generative continue e di no bandonâ i docents a se stes. Zuiant ancje su la motivazion: “I Inglês – al conte Forte – a àn un sisteme dulà che un insegnant daspò un ciert numar di agns al pues deventâ, cun valutazions di pueste, “senior teacher”, insegnant espert: al è chel che al indrece i gnûfs rivâts, ur da lis dretis par frontâ lis classis e al cjape plui bêçs di chei altris, ma al à une possibilitât di cariere”
FORMAZION MA ANCJE VALUTAZION_ Ma se si ves di passâ a un sisteme furlan pardabon no si podarès passâ parsore a un teme centrâl: chel de valutazion. “Cumò inte scuele taliane la culture dal merit e je zero: o valutìn dome l’anel plui debil de cjadene, il student. Ma la scuele? L’insegnament? Ce sorte di valutazion de lôr ativitât vegne dade?”. Si sta scomençant planc planc a introdusi un sisteme di judizi, ma cun tantis resistencis: purpûr al è un dirit dai students cognossi la cualitât dal insegnament che ur ven dât”. Chest al sarès un grant pAs indevant: “al è il merit che al varès di deventâ la fonde di cheste gnove rileture in clâf furlane dal model educatif, se une dì – come che Forte al auspiche – il Friûl al varà potestât primarie pe istruzion. Za agns indaûr si sarès podûts rivâ a un model come chel valdostan o trentin pontant i pîts su la nestre specialitât – al dîs – ma no je stade di bande de int furlane la determinazion di sburtâ in cheste direzion. Sì, al è stât impuartant vê une fuarte adesion al insegnament de lenghe furlane, ma la scuele de autonomie e varès podût jessi la ocasion par bandonâ il centralisim ministeriâl e studiâ gnûfs programs che a fossin il spieli di une comunitât braurose dal sô caratar unic”. Ma nol è stât cussì: “la scuele progjetade di bessôi e je restade il sium di une elite”. E cumò al podarès jessi masse tart: “la crisi e sburte dome viers il tai di risorsis. E cumò, ancje a ricevi la competence in materie di scuele, a saressin problemis a esercitâle parcè che cence bêçs no si va di nissune bande.
LA CLASSE DIRIGJENTE NO JE STADE A LA ALTECE_ In dut chest la grande assente e je la classe dirigente de Regjon. E no dome che politiche: “in chês altris Regjons si è lâts fin dapît cun dutis lis batais pe scuele rivant fin in cort costituzionâl. Nô invezit no rivìn ancjemò a considerâ che la scuele e sedi un imprest par fâ cressi il nestri teritori. Se i ladins a àn la lôr scuele al è parcè che a àn scombatût par chest, cence pôre”. ■
Walter Tomada