«Se al è un setôr dulà che i furlans a àn za fat di bessôi e a son deventâts un model di avanvuardie, chest al è chel de sanitât». Peraule di Paolo Bordon, diretôr de Aziende Sanitarie numar 5 de Basse, realtât di 1500 dipendents cun doi ospedâi (Palme e Tisane), doi distrets, un Dipartiment di Prevenzion e un di Salût Mentâl che al à a pene screât il secont Csm sul so teritori. «Un model che al funzione» nus dîs, «intun compart che al à vût grant benefici de decision de Regjon di distacâsi dal Servizi Sanitari Talian e di lâ di bessole par esercitâ cun fuarce dute la sô autonomie».
LA AUTONOMIE DE SANITÂT FURLANE_ Bordon nol plate la sô personâl stime pes personis (prin fra ducj, Gianpiero Fasola, assessôr regjonâl ae sanitât di chê volte) che tal 1997 a àn sielzût di cjapâsi sù pe schene cheste responsabilitât: «Al podeve jessi un risi, i pericui peâts soredut al autofinanziament a jerin tancj. Ma i pas indevant che lis struturis e i operadôrs a àn fat in chescj 15 agns a mostrin pardabon che la sielte e je stade vincente. Cumò dut câs bisugne continuâ cussì e rivâ a fâ sieltis coragjosis ancje se magari a puedin someâ impopolârs». Come la Aziende Uniche? Bordon nol rispuint (al fâs capî che lis sieltis politichis no àn di fâlis i manager), ma al è clâr che “fâ di bessôi” in timps dulà che la cuvierte e je simpri plui curte al à di sburtâ a semplificazions e tais dai nivei decisionâi. Se no, invezit di fevelâ di sanitât di ecelence “ae furlane”, che si misure cu la Baviere o l’Ile de France, si larès a finîle tun model stîl Lazio o Calabrie.
UN ASSESSÔR CHE AL CJALAVE LONTAN_ La riforme Fasola e je di fat «un esempli di cemût che i furlans a varessin di doprâ la specialitât in ducj i setôrs: cun braùre, cence presunzion ma ancje cence pôre». I vantaçs di une sielte autonome a àn puartât a «nivei di organizazion che a son dongje dai miôr standard europeans». I numars a fevelin clâr. «Vincj agns indaûr o vevin un dai tas di ospedalizazion plui alts de Europe: 230 ricoverâts ogni mil abitants. Cumò, intun periodi avonde curt ma cun intervents une vore articolâts, o sin rivâts a un tas di 140 che al vûl dî une riduzion dal 40 par cent. Chest nus puarte ai nivei plui bas di Europe: e nus fâs deventâ un pont di riferiment pe atuazion dai indicadôrs di eficience fissâts de Organizazion Mondiâl de Sanitât. Chest parcè che la deospedalizazion no à volût dî une plui basse rispueste di salût di bande dai servizis. Anzit, lis rispuestis a son stadis puartadis plui dongje dai citadins, sul teritori, cui Distrets e la Assistence Domiciliâr Integrade, che vincj agns indaûr e someave un spot e cumò e je invezit un model che dute la Italie e cîr di copiâ».
I PROGJETS PAL AVIGNÎ_ Ma alore ce restial di fâ? A sintî chescj resonaments al somee dut ben e dut bon. «No, al è cetant ce lavorâ ma simpri lant a sielzi soluzions di avanvuardie in tiermins di inovazion e di concretece. Lis ideologjiis no coventin. E covente inteligjence. E che, par fortune, le vin. Tocje doprâle par viazâ dîs, vincj agns indevant e capî ce model di societât che o varìn. Par esempli, i ponts nassite che cumò a somein cussì necessaris a van incuintri a une riduzion de natalitât che si è zaromai manifestade l’an passât. Il nestri nivel di popolazion al restarà chel, parcè che si è fermât ancje il flus migratori che al jere cressût tai ultins agns. Alore intune societât dulà che la vite si slungje e a cressin lis problematichis cronichis, plui che di ponts nassite si varà di ocupâsi di pazients che a sofrissin di malatiis degjenerativis e di malâts terminâi. Riabilitazion e prevenzion a scuegnin jessi al centri de azion di salût che o puartarìn indevant e par chest o varìn di doprâ miôr che si podarà lis Facoltâts di Medisine che o vin la fortune di vê a Udin e a Triest». «A son une garanzie impuartante inte continuitât de preparazion di operadôrs di cualitât par chel model di avanvuardie che al covente pe nestre sanitât». Un model che Bordon al imagjine atratîf: «a mancjin pediatris e anestesiscj come che a mancjavin infermîrs. Rivâ a atirâ personâl cualificât di altris bandis de Europe al sarès biel e impuartant, par fâ capî che il Friûl nol è plui tal cjanton de Europe che e conte ma cumò al è al centri, e nol vûl tornâ indaûr». ■
Walter Tomada
