Sfuei Mensîl Furlan Indipendent
Archivi de Patrie

AFÂRS INTERNAZIONÂI. Internazionalizazion in cinc mossis

Walter Tomada
Dissen di Gianni Di Lena
Dissen di Gianni Di Lena

Ce coventaressial par leâsi di plui ai paîs dongje?
Al coventarès vê infrastruturis eficientis. E su chest teren o sin une vore in ritart. E no stoi fevelant dome des infrastruturis materiâls, ma ancje di chês imateriâls. Siet-vot agns indaûr mi soi rindût cont di chest cuant che o soi lât in Estonie e in Letonie. Bar, trens, avions, parcs: tu puedis lavorâ cul computer pardut parcè che dut il paîs al è cablât. E che al cjali che la bande largje e covente come lis autostradis, parcè che i trois de cognossince in dì di vuê a àn di cori svelts. Rispuindi mieze ore dopo a une domande di forniture al fâs pierdi bêçs.
L’aeropuart di Roncjis nol à vut il disvilup che si spietavisi.
O vin sbaliade strade. No si podeve competi sul trafic passizîrs cun Vignesie, ma si varès vût di deventâ un piçul hub viers dal Est european riservât soredut aes impresis e ai imprenditôrs. O cîr di spiegâmi: a un imprenditôr che di Palermo al à di lâ a Budapest o varessin vût di furnî no dome la pussibilitât di rivâ culì ma ancje di podê vê lis informazions par distrigâsi in chel paîs, e magari ancje un interprete. O vevi fate cheste propueste cuant che o jeri president di Finest, ma no je lade a bon fin.
La tierce corsie ise cussì necessarie?
E je necessarie no al Friûl, ma ae Europe interie. Jo però no capìs parcè che inaltrò daspò 50 agns di comunisim in 20 agns a àn fat autostradis cence problemis e chi di 30 agns la A4, la A28 e tantis altris robis a finissin tun pantan decisionâl che nus paralize. Cence contâ che in Italie a son ancje altris problemis tant che il cost de energjie, il cost dal lavôr, la pression fiscâl e la burocrazie elefantiache, che dispès a àn sburtât i nestris impresaris plui a delocalizâ che a espuartâ. Tornant ae sô domande, la tierce corsie, cuant che a finiran di lavôrs jenfri Ucraine e Ongjarie, e sarà il cuel di butilie par une cuantitât une vore penze di camions che a viazaran viers de Russie. Salacor o deventarìn un probleme european… No vin di rivâ a blocâ ducj i flus internazionâi de mobilitât.
Sperìn di no, ma cemut si podaressial fâ rindi plui atrative la nestre economie?
Inventâsi alc, e di corse. In Serbie, cuntune politiche salvadie di esenzion fiscâl e doganâl, a àn rivât a atirâ capitâi, ma ancje a deventâ pont di riferiment par une aree come dute la ex Union Sovietiche, in gracie di un acuardi di libar scambi. Al è clar che nô no podìn imagjinâ operazions cussì disinvoltis, ma cualchi idee in plui par facilitâ i scambis, chel sì… O sin une base logjistiche naturâl, ma se invezit di atirâ chei che a àn di “doprânus” ju mandìn vie…
Inte scuele ce formazion laressie sburtade par judâ ducj nô a jessi un tic plui “diplomatics”?
Facil. Lis lenghis. Il plurilinguisim al è pe nestre Regjon un vantaç strategjic di coltâ, no di butâ vie. La cognossince des lenghis e varès di jessi patrimoni di ducj, ma soredut de classe dirigjente, in prin lûc chê politiche. Cognossi lis lenghis al vûl dî capî chei altris e capî il mont: e dome cui che lu capìs, al pues ancje cirî di cambiâlu. ■
Walter Tomada

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +