Deventâ montagnârs e inventâsi un lavôr

In tancj a continuin a scjampâ de mont furlane, i numars a fevelin clâr. Nonostant dut però a son ancjemò personis che tal cidinôr, tai agns, a àn sielt, in cuintritindince, di partî de plane e des citâts di bessôi o cu la lôr famee, par vignî a stâ in mont e magari vierzi une imprese. Parcè lu àno fat? Ce oportunitâts àno cjatât? Cuale ise la lôr storie?
A chestis domandis al rispuint il libri «La montagna degli altri», scrit de gjornaliste di Raviei Tanja Ariis, pal editôr Andrea Moro di Tumieç, in colaborazion cu la cooperative Cramârs. Si podin scuvierzi par esempli lis storiis di Gregorio Piccin, gjestôr dal camping Valtramontine di Tramonts Disot, Sergio Scalet, artist e component dal grup Hackatao di Doltris di Dimpeç, Kaspar Nickles de aziende agricule Tiere Viere di Dordole di Mueç. Il libri al da vôs a une trentine di personis, tra piçui imprenditôrs e gnûfs abitants dai paîs di Tramonts, Clausêt, Ert e Cjas, Claut, Sauris, Dimpeç, Davâr, Rigulât, Darte, Sudri, Resie e Mueç.
Si concentre su pes esperiencis personâls, di vite e di microimprese, ma ancje su lis motivazions che lis àn gjeneradis. Tal tornâ aes lôr contis di vite vere, a cjapin ad imprest lis lôr sensazions, dant indaûr sponts di riflession pai montagnârs di nassite, cussì come ancje par chei che magari a son tentâts di lâi daûr a cheste gnove strade.
Nissun si insumie di pensâ cussì di fermâ il dispopolament, ma almancul crodi che la linie di tindince e puedi jessi frenade in gracie dal esemplis dai forescj inamorâts de mont, chest sì. ❚
David Zanirato