Democrazie. Nuie di sigûr

La democrazie, nassude come “guvier dal popul” e je dabon une vore di plui. Ni une definizion ugnule, ni une teorie di valôr universâl parcè che e je stade interpretade cun diversitât une vore di voltis vie pe storie. Nancje vê il dubi che al sedi un procès in disvilup continuât. Si esprim midiant dal vôt politic, ma no dome.
◆ La peraule e je stade doprade sul imprin a Atene, e e je componude di “demos”, personis e “kratos”, podê. Al è stât l’Iluminisim a dâ forme ae vision europeane e anglosassone moderne de democrazie, metint al centri l’individui e la sô capacitât di judizi.
Ducj i citadins a àn le stesse impuartance; a ognidun i son ricognossûts i dirits primariis de libertât e avualance come ancje la responsabilitât di tignî di voli lis azions di chei che a son stâts sielzûts cuntune elezion.
Un sclariment precîs al è chel di Abraham Lincoln, il XVI president dai Stâts Unîts: “Guvier dal popul, espression dal popul, pal popul.”
◆ Dut câs, a nivel globâl, vuê la democrazie e je sot pression. Stant a Freedom House (www.freedomhouse.org), une organizazion indipendente e sorenazionâl che dal 1941 e fâs ricercje in dut il mont su la sensibilizazion de int in cont de democrazie e de protezion dai dirits umans, la libertât e je lade in mancul intai ultins doi decenis. Dal studi puartât indenant tal 2025 al ven fûr che il 72% de popolazion mondiâl al vîf in regjims autocratics e dome il 28% in chei democratics. Vâl a dî che, plui o mancul, 6 miliarts di personis a vivin inte tiranie; un numar mai stât cussì grant. E je la dimostrazion de debilece de democrazie che, magari cussì no, e je precarie e provisorie.
◆ Cun dut che par tancj al è il miôr sisteme politic intune societât sane e no vuelin rassegnâsi a pierdile, e je metude in forsit propit tai Paîs che le àn concuistade cun sacrificis e privazions.
Parcè cheste crisi di fidance? Tra lis tantis resons: i guviers che a dan la idee di jessi ostaçs dal marcjât, i partîts politics cence ideâi, l’indebiliment dai leams sociâi cu la cressite di individualisim, isolament e conflitualitât.
Ma une cuistion impuartante di fonde e je ce che al capite tai Stâts dulà che lis disparitâts economichis a cressin dì par dì.
◆ A dispiet di cheste evoluzion che e preocupe, l’autoritarisim al è però simpri reversibil.
Lu sostegnin tancj studiôs dutun cun Steven Levitsky, un dai esperts plui impuartants tal mont sui procès di democratizazion.
◆ Une societât civîl inscuelade e informade e lote par difindi e inzornâ lis istituzions democratichis.
La democrazie e reste in salût cu la partecipazion, midiant dal dibatiment public, cu lis opinions indipendentis e la responsabilitât morâl di difindi il costrut democratic.
◆ Par fortune, i anticuarps cuintri l’autoritarisim no ju vin ancjemò pierdûts. ❚