“Da Duga” a Salârs: la cjase dai siums di Ulderica Da Pozzo

“Cheste cjase e je une part di me, e je la cjase dai ricuarts, indulà che o ai passât i moments plui biei de mê vite; e je la cjase dai odôrs e de int che no je plui; achì a son ancje lis mês lidrîs”, e conte la fotografe Ulderica Da Pozzo, fevelant de sô cjase dal 1700, “Da Duga” a Salârs, piçul borc dal Comun di Ravasclêt/Monai.
“Par vecjo, i miei vons a vevin un manç e duncje al jere il lûc indulà che si cjatave tante int. Vuê o ai volût sistemâ cheste cjase, mantignint lis carateristichis origjinariis, par che la int si torni a cjatâ e    par che al deventi il lûc magjic indulà che i siums a puedin cjapâ vite”.
E cussì, il prin sium si è tramudât in realtât ai 28 di Dicembar dal 2013 cul licôf, tal plan tiere, de mostre fotografiche di Ulderica Da Pozzo “Stanze/Rooms”, za presentade cualchi timp indaûr a Rome. Si trate di une serie di fotografiis che a metin in lûs particolaritâts ancje dismenteadis des stanzis di cjasis in abandon, che magari vuê no son plui.
Une cjandele a picj, lis pituris di îr e di vuê che si dan la volte tes parêts, imprescj dismenteâts, la presince di une anime che e cjacare a cui che al sa cjalâ cun voi diviers chest mont e lei, daûr, la sô storie. E dongje des dôs stanzis, vecjis cjanivis a volt dedicadis aes fotografiis, si cjate la biblioteche indulà che si puedin viodi, tocjâ, lei libris di fotografiis, sedi di Ulderica sedi di altris autôrs impuartants. “Cussì, un che al ven al pues ancje fermâsi a sfueâ un libri”, e conte la parone di cjase.
Ma in pîts a son tancj siums/progjets di puartâ indevant: fâ deventâ il stali li dongje une mostre multimediâl permanente, ospitâ altris mostris di altris artiscj, sistemâ un plan de cjase che al deventarà il lûc di ispirazion par tancj artiscj.
In chescj dîs il puarton de cjase “Da Duga” si è tornât a vierzi e, cui timps che a corin, pe Cjargne al è un grant event e soredut un segnâl di sperance.
No si cjatarà plui il manç che al zire ator pe cort o la stale plene di vacjis o la cjanive nere che e fume purcine, e no si podaran nancje plui nulî i odôrs dal fen a pene taiât e scoltâ i rumôrs di un timp, ma si podarà passi il voli te armonie de antighe struture de cjase. E tal cidinôr di Salârs, si podaran gjoldi i moments di vite che Ulderica Da Pozzo e à fermât su la pelicule de fotografie. ❚
Marta Vezzi