CURTIS E CHE SI TOCJIN. La “medisine” par Triest e je simpri chê: cirî di gloti il Friûl

Te suaze de discussion sul plan sanitari regjonâl, e je tornade fûr ancjemò une volte la cuestion de unificazion des dôs facoltâts di medisine di Udin e di Triest. Che e à l’obietîf, naturalmentri, di otignî che chê di Udin e sedi sotane di Triest. Cheste liende si incuadre te campagne, sostignude fin de vierzidure di cheste legjislature regjonâl, de assessore triestine Rosolen. Cui fins, di volte in volte sostignûts, o di unificâ lis dôs Universitâts, o di meti in pîts une fondazion uniche cul mani in man ae Zonte regjonâl, o formis di unificazion o di “cooperazion” dai diviers cors di lauree dai doi Ateneus. Naturalmentri, simpri cul obietîf di ridusi la autonomie e la identitât de Universitât dal Friûl, ancje se taponât de esigjence proclamade di sparagnâ bêçs e strassariis. Intune Regjon piçule – a disin –, là che al sarès avonde un sôl Istitût universitari. Naturalmentri, chel di Triest…!
Ae fonde di chest resonament triestin ( ma ancje di cualchi furlan cence patrie ), e je simpri chê: di no vê capît ni cincuante agns indaûr, ni cumò, che il Friûl al è une realtât culturâl, linguistiche e storiche difarente di Triest, che al è altri. E che, di conseguence, il Friûl nol podarà mai dâ il bon acet a cheste union regjonâl metude in pîts sot la sotanance di Triest. Soredut cuant che si trate de massime Istituzion culturâl e formative des zovinis gjenerazions furlanis e dal motôr di svilup gjenerâl de nestre tiere. Dut chest, noaltris furlans lu vin dimostrât cun tantis bataiis di popul par otignî la nestre Universitât autonome che – come che al dîs l’articul 26 de sô leç istitutive dal 1977 – e à il compit di “contribuî al progrès civîl, sociâl, ae rinassite economiche dal Friûl e di deventâ imprest di disvilup organic e di rinovament dai filons origjinâi de culture, de lenghe, des tradizions e de storie dal popul furlan”.
Lu vin ancje dimostrât cuant che, tal 1982, te seconde leç statâl de ricostruzion, o vin otignût finalmentri dal Parlament talian la istituzion de Facoltât di medisine a Udin. Batint, ancjemò une volte, lis contrarietâts fuartononis triestinis che, in chê volte, a vevin tirât de lôr bande fintremai il ministri de Istruzion.
Dî e tornâ a dî – come che a fasin i triestins – che tocje finîle cu lis strassariis des dôs Universitâts te Regjon, des doplis facoltâts a Udin e a Triest, o dai cors di lauree al è come pratindi che, dopo il no a Udin, si disi di no ancje a Triest, par lâ a finîle cul acentrament dut tal Venit, magari a Padue Dismenteant cussì doi ponts fondamentâi. Il prin, che il popul furlan pe sô incressite culturâl e sociâl al à dirit di vê une Universitât autonome e specifiche, come che al dîs l’art. 26 de sô leç istitutive che o vin a pene vude indiment. In secont lûc, che la Facoltât di medisine di Udin, in gracie de alte cualificazion dal so personâl docent e des sôs struturis didatichis e sientifichis, e je zaromai di ben siet agns in ca considerade in mût uficiâl la prime Facoltât di medisine di Italie!
Curtis e che si tocjin, inalore. O disìn vonde a chestis vôs che di continui si alcin cuintri il Friûl e la sô Universitât autonome. E vonde ai politics furlans di ducj i partîts che, di bogns sotans, a fasin fente di no sintî e a tasin.
ARNALT BARACÊT