CURTIS E CHE SI TOCJIN. Cuâl federalisim?

Al somee che al sedi il moment, a nivel dal Stât talian, di meti finalmentri in vore il federalisim fiscâl, cussì lu clamin. Che al volarès dî, secont il segretari de Leghe Nord Bossi, scomençâ a lassâ a Regjons, Provinciis e Comuns plui beçs di cumò. Par frontâ daspò il federalisim politic, ven a stâi la destinazion ai Ents decentrâts di podês e di funzions vuê in fuarce al Stât centrâl e centralist. Se si scomençàs a procedi in cheste direzion, nô furlans o varessin di jessi contents parcè che si pandarès che l’aiar finalmentri al gambie direzion e al tache a soflâ in pro des autonomiis. No vin par altri di fâsi masse ilusions: i nemiis dal decentrament a son fuarts sei tal schiriament di centri drete, che ta chel di centri çampe. Al è avonde ricuardâ lis posizions dal ministri Brunetta che, fevelant de riforme federalistiche dal Stât talian, al à vût la biele idee di prudelâ la abolizion dai Statûts di autonomie speciâl cun dentri ancje chel de nestre Regjon! O lis dificoltâts e lis contrarietâts a rispietâ  la Costituzion e la leç pal passâç dal Venit al Friûl dai Comuns de zone di Puart che lu àn domandât cun referendums votâts de grande maiorance dai lôr citadins. O il refût di Rome sedi al gnûf Statût de nestre Regjon, sedi ae leç regjonâl pal furlan .
Ce che in chestis setemanis noaltris autonomiscj o vin di fâ vignî fûr cun fuarce, al è che il federalisim, cul decentrament di podês che lu compagne, al à di jessi puartât indenant ancje a nivel des Regjons. No podìn di fat acetâ che al puest di un Stât centralist si vebi il centralisim a nivel di Regjon. Cemût che al è sucedût fin cumò. Al è chel che noaltris o sostignìn di agnorums. Culì, in cheste Regjon, il centri drete ancjemò tal 2002 al à votât in Consei regjonâl une leç par lassâ ae Regjon dome podês legjislatîfs e di direzion gjenerâl, destinant podês di atuazion e mieçs finanziariis a Comuns e Provinciis, singui e associâts. Ancje  il centri çampe al à votade in Regjon la leç n. 1 dal Zenâr 2006 sul decentrament. Ma fin cumò ni la prime leç, ni la seconde a son stadis rispietadis. Parcè che, a nivel regjonâl, i partîts – ducj i partîts di cualsisei colôr – a vuelin vê, in plui dal podê legjislatîf, ancje la borse. Par coltâ e par tirâ sù clientelis, gnovis adesions e preferencis. La int, Comuns e Provinciis, a vuelin – purpûr – che lis decisions a sedin simpri plui vicinis al popul, parcè che dome cussì il podê al pues jessi controlât miôr dai citadins.
Cheste e je une cuestion centrâl pal Friûl che al cîr identitât, unitât e autoguvier in cheste Regjon, dulà che al è stât metût, cuintri voie, insiemit cun Triest. Dant vite al decentrament regjonâl, ae leç 1 dal 2006, al vûl dî ancje dâi gjambis, podês e bêçs ae Comunitât des Provinciis furlanis, metude adun tal Setembar dal an passât, des Provinciis di Pordenon e di Udin e doman, sperìn in curt, ancje di chê di Gurize.
Curtis e che si tocjin, inalore! In Friûl, cui che al sosten il federalisim statâl al à di jessi ancje par chel regjonâl, che al vûl dî puartâ decentrament, disvilup e autoguvier al popul intîr di cheste nestre tiere.
ARNALT BARACÊT