CURTE. La crôs di Aquilee

Al è tornât a jessi publicât il periodic di informazion de Confraternite dai Benandants, une associazion no dome culturâl che si cjate ogni tre mês, al scjadi di chês che si clamin tempora, che e torne a scuvierzi il mît dai Benandants, chei nassûts cu la cjamese che a scombatevin cu la mace dal fenoli, svolant tal cîl de Patrie vie pe gnot: i difensôrs dal Ben cuintri lis fuarcis dal Mâl.
Al torne duncje il sfuei dai Benandants, grazie soredut ae disponibilitât e la buine volontât dai Furlans di doman. Chest sfuei rignuvît al è e al sarà a disposizion dai Benandants e di ducj chei che a vuelin leilu. La Crôs di Aquilee, tes intenzions, al vûl restâ un sfuei di informazion, sempliç, e cence pretesis par comunicâ dentri de Confraternite dai Benandants, ma al è cu lis orelis spiçadis par sintî ce che al capite tal mont e par jessi atent ai problemis e a lis necessitâts dal Friûl e dai Furlans. Un grazie di cûr, za di cumò, a ducj chei che a àn dade e a dan une man. ■
Redazion