Cun “Folkest” la musiche dal mont in Friûl

Plui di sessante apontaments intune ventine
di comuns furlans, ma ancje in Venit e Slovenie
A vegnin di dut il mont i artiscj che, tant che ogni Istât dal 1979 incà, a animaran i tancj palcs di “Folkest” – simpri firmât de direzion artistiche dal musicist e etnimusicolic Andrea Del Favero -, chest an in program dai 20 di Jugn ai 22 di Lui, cuntune schirie di concierts, incuintris, presentazions editoriâls che a tocjaran une ventine di comuns furlans, ma ancje in Cjadovri e in Slovenie. Passât traviers cambis di gust e di modis, “Folkest” al à simpri tignude alte la stangje de cualitât de programazion, molant sui grancj avigniments di place e pontant su la difusion sul teritori, sul inlidrisament e sui zovins. Ancje chest an a saran artiscj une vore diferents i protagoniscj dal festival principâl che al esplore lis musichis e lis culturis dal mont – Hoodman Blind, Lewis McLaughlin Trio, Baile, Lune Troublante… dome par fâ cualchi non -, realizât cul contribût de Regjon e la poie fondamentâl de Fondazione Friuli, cun dongje la colaborazion dai Comuns coinvolzûts. Tra i ospits di cheste edizion – la cuarantesime prime -, insiemi a nons internazionâi e ai zovins di talent finaliscj dal “Premi Folkest – Alberto Cesa”, ancje il duet Shel Shapiro-Maurizio Vandelli (cjistiel di Udin, ai 9 di Lui) e la intramontabile PFM (Cjaudistrie, ai 20 di Lui). A sierâ la edizion 2019, ai 22 di Lui, intal cjistiel di Udin la cjantautore canadese Loreena McKennit. Dut il program su www.folkest. com ❚
par cure de redazion