Altri che farse de massarie e dal plevan! Cualitât e libertât tal teatri furlan dal passât

“Trame ricucite”, un progjet dal “Giovanni da Udine”
par riscuvierzi tescj fondamentâi de dramaturgjie furlane

Il gnûf president de Fondazion Teatri Gnûf “Giovanni da Udine”, Giovanni Nistri, lu veve imprometût a pene che al jere stât nomenât: «Plui spazi ai spetacui par furlan», cuntune declarazion in cunvigne cu lis propuestis de gnove aministrazion dal Comun di Udin e che, nancje dîlu, e lave a tocjâ chel cantin tant cruziât di un Teatri Stabil furlan che fintremai Nico Pepe al veve vût iniments.
No cate la sô esperience tant che atôr amatoriâl, Nistri nol è om di fâ promessis di arlechin, duncje ve che, dongje di chel che al sarà il progjet pal inviament de produzion di spetacui in lenghe furlane (e che o sperìn di viodi in curt), la Fondazion e à dade vite a “Trame ricucite”, une rassegne di trê apontaments che si fasaran vie pal mês di Mai (ogni miercus di sere, dai 8 ai 22), intun percors ae riscuvierte dai tescj fondamentâi de dramaturgjie furlane che, ancje se a son stâts scrits vie pal Nûfcent, a àn dentri elements che ju rindin bogns e atuâi ancjemò in dì di vuê.
Al è clâr che, fevelant di un progjet che al va a scandaiâ la dramaturgjie furlane, il prin pinsîr al ledi a Angela Felice, che cu la sô passion e cu la sô personalitât e jere rivade a tignî simpri impiât il ferâl de cognossince des oparis e dai autôrs dal passât, adun cun Paolo Patui (al baste ricuardâ la publicazion a cuatri mans “Il teatro friulano. Microstoria di un repertorio tra Otto e Novecento”, o i incuintris di “Sipari furlan”). La propueste, in efiets, e je un omaç a cheste femine straordenarie e e nas des riflessions che la stesse Felice e veve tacât a meti in cantîr cun Patui, che al à puartât indevant i resonaments e al è il tamonîr di “Trame Ricucite” tant che ideadôr e diretôr artistic. In plui de sielte e dal adatament dai tescj, il critic teatrâl al intervignarà ancje dulinvie des seradis cui siei coments, intune sorte di lezion-spetacul o miôr, come che al à spiegât Paolo Sartori, curadôr des azions senichis, e sarà plui une prove gjenerâl, indulà che sedi il public che i atôrs a varan la pussibilitât di interagjî e di domandâ sclariments (no par nuie, lis sentis pal public a vignaran metudis propit sul palc).
Il fin, di fat, al è chel di fâ cognossi oparis che a àn segnade la storie dal teatri in lenghe furlane, no dome pe cualitât de scriture (un dai autôrs sielzûts al è Luigi Candoni, che lis sôs comediis a son stadis puartadis ator par dute Italie e tal forest, cun cetancj ricognossiments tai concors nazionâi), ma soredut pai contignûts e pal ûs linguistic. Elements, chescj, che si slontanin de vision stereotipade di un teatri di provincie, bon dome par fâ ridi e par contâ fufignis, cemût che dispès si lu è intindût, cuntun prejudizi cetant lontan de veretât, stant che ancje lis filodramatichis a son simpri plui atentis ai spetacui che a puartin in sene, che il plui des voltis a vegnin metûts adun cul jutori di professioniscj o daspò di vê seguît dai cors, cul gust di sperimentâ tecnichis diferentis e di frontâ argoments di atualitât, e no la solite farse de massarie e dal plevan.
«Il nestri jessi un paîs di frontiere – al marche Patui – nus à puartâts par masse agns a considerâ ancje la produzion artistiche tant che minôr, cuant che invezit cetancj prodots dramaturgjics dal passât – che in dì di vuê a son pal plui discognossûts – a àn mostrât la lôr fuarce propit tal jessi fûr de bufule dal nivel culturâl talian e duncje libars dai siei schemis e gjeneralizazions». No dome: tai tescj sielzûts par chest prin cicli di incuintris – “Strissant vie pe gnot (Caino)” di Luigi Candoni (prin apontament), “Mariute” di Ettore Carletti (ai 15 di Mai) e “I Purcinei” di Arturo Feruglio (ultin apontament) – la lenghe no je dome une forme di comunicazion, ma e devente espression plene dal mont indulà che si davuelç la storie, in plui che de divignince culturâl dai personaçs. Il furlan, duncje, si cjate a confrontâsi cun altris lengaçs e, di consecuence, cun altris manieris di pensâ: dal inglês civilizât di “Blanc” (interpretât pe ocasion di Giuseppe Bevilacqua, che lu impersonà ancje tal 1975, cuant che al vignî puartât in sene pe prime volte, cu la regjie di Rodolfo Castiglione) che al trusse cuintri dal furlan salvadi de famee di Caìn, in “Strissant vie pe gnot”, al talian bassarûl dal soldât che al rive sul front te prime vuere mondiâl in “Mariute”, al dialet venit che al met in evidence la aviditât e la miserie di sintiments dai “Purcinei”. Altri element che al ten adun i fîi di chestis oparis e je la crisi de dimension familiâr, metude in discussion di personaçs che a son regredîts a nivel di primitîfs in podê dai lôr istints (“Strissant vie pe gnot”), o ben scjafoiade de ipocrisie des convenzions sociâls e dal perbenisim (“Mariute”) o, ancjemò, talpassade des bramis e dai zûcs dal podê (“I Purcinei”).
In definitive, cun “Trame Ricucite” la Fondazion dal “Giovanni da Udine” e smire a cjapâ sù il glimuç des esperiencis lassadis in ereditât dal passât par tacâ a fânt un araç a disposizion di chei che a àn a cûr la nestre lenghe, sedi par chei che le doprin ducj i dîs, sedi par chei che no le fevelin, ma che le difindin tant che element di identitât, di mût che chei colôrs e chês urdiduris di un timp a sedin un stimul par inventâ formis gnovis di espression par un doman. Lis premessis, duncje, a son plui che buinis e o sin de idee che, cumò che il fier al à tacât a scjaldâsi, no tardarìn a viodi altris iniziativis di chest stamp. ❚
Serena Fogolini