Cumò al è sigûr: di chest Istât a Clanfurt a ziraran dome bus cence sofêr

Il progjet che al previôt il traspuart di personis di un puest a di un altri de citât su navutis cul pilote automatic, si clamarà “Smart Urban Region Austria Alps Adriatic”, in struc “SURAAA”. Autobus cence sofêr, a vuide autonome: e somee fantasience, ma a Pörtschach a son une realtât bielzà dal 2017.
◆ Ancje a Clanfurt si è provât intal 2018 cuntun bus a vuide automatiche che par une setemane al à fat servizi de Alten Platz fin al palaç dal Parlament regjonâl. Cumò si scomence plui in grant: i bus shuttle a viazaran de stazion Ovest de universitât, dulinvie de Villacher Straße e il Südring, passant pal Minimundus, par rivâ al Lakesidepark e indaûr.
Lavorant ad implen, lis trê navutis a ziraran dal lunis al vinars, fale che intes oris di ponte e si podaran doprâ sore nuie.
◆ Lis provis si fasaran intal mês di Jugn, ma cence passizîrs e, se dut al funzionarà, si scomençarà in Lui cul servizi vêr. Ogni navute e podarà menâ nûf personis e e sarà vuidade midiant di un sisteme satelitâr di videocjamaris e sensôrs che i mandaran une imagjin a 360° dal ambient che i sta ator. La navute e corarà suntune sine virtuâl, cuntune precision di 1,5 cm. In câs grivis un intendent ae sigurece al podarà intervignî su la corse cuntun joystick.
◆ Lis navutis a coraran vie par Clanfurt a une velocitât medie di 20 km/h, in mût plausibil cence creâ problemis su la Villacher Straße a plui corsiis, intant che su la Universitätsstraße i automobiliscj che ses cjataran devant, a varan di vê pazience! Une vuide masse dongje o ben taiâi la strade a son tuessins pes navutis, stant che i sensôrs a son tarâts su la sigurece, si che duncje i automobii a scugnaran mantignî distancis di sigurece, come che si à imparât a scuele vuide.
◆ L’implant al sarès chel di meti a disposizion navutis a sofêr automatic 24 oris su 24 e siet dîs su siet, tignint bot in cheste maniere ae mancjance croniche di autiscj e fasint cuintri ancje al cambiament climatic e al incuinament causionât di ducj i citadins che a scuegnin doprâ la machine in citât ancje par tratis une vore curtis. Stant ai aministradôrs dal progjet, dut chest al sarà metût in vore dentri dal 2030.
◆ Tant che o vin vût dit, lis navutis a son za une realtât a Pörtschach za dal 2017 indenant, là che a son stadis dopradis ogni dì di plui di 20.000 passizîrs, ma e je une realtât che e à cualchi intop. Il mês di Avost dal an passât une navute e je lade intor di une auto in soste. Chest al è sucedût in modalitât manuâl, intant di une manovre di parcament.
La tecnologjie e à simpri dôs musis e la prudence no je mai masse. Il progjet di Clanfurt al sarà nome une prime cerce. Lis navutis a coraran fin ae Sierade, daûr di un orari che al sarà pandût cuant che il servizi al scomençarà a funzionâ. Se la valutazion e sarà positive, l’an cu ven a saran metûts in vore altris provis.. ❚