CULTURE. «Vuê o sin cun…»: a torseon cun Tele Alto Bût

Se ducj a savessin dulà che si cjate malghe “Zermula”, sore Paulâr. Se ducj a cognossessin la strade par rivâ culì e par gjoldi dal panorame e dai prodots che tal so agriturisim si preparin, probablimentri chest program televisîf nol varès sens di esisti. Invecit sì “Vuê o sin cun…” al à la sô fonde. Al è une des novitâts dal palinsest par furlan di Tele Alto Bût, la television de Cjargne, che e trasmet dai studis di Paluce. “Planc pes curvis – al spieghe il president de emitent di Paluce, Tite Muser – nô o trasmetìn dut te variant cjargnele. Ae nestre int ur plâs cussì”. Scuasi dut. La ecezion e je la messe de domenie, che e ven trasmetude daspò un acuardi cun Tele Radio Padre Pio e cualchi program di musiche folk e di tv “gjeneraliste”, che al ven prelevât di un circuit di televisions satelitârs.
La gnove de prossime programazion e je duncje chest program al viert, dut zirât su lis pichis de mont, par ricès e malghis. Za proponut al public in vie sperimentâl cun cualchi pontade-pilote, al à vût cussì tant sucès che cumò al cjaparà une sô colocazion fisse tal palinsest, a scjadince bisetemanâl. In fase di studi la dì e l’orari. Tite Muser e Lele Plazzotta, rispetivementri regjist e condutôr dal program, no nascuindin entusiasim e fature: “Migo al è facil lâ sù par monts cun microfons, batariis, telecjameris e altris argagns”.
Cemût isal struturât chest program? In ogni puntade i doi a visitin un agriturisim, une malghe, un ricès di mont. E a contin lis storiis di fameis che culì a vivin, par sielte o par afârs. Storiis di int che e puarte indevant, cence savêlu, tradizions e mistîrs che nissun no vûl plui fâ. Sieltis di oms e di zovins, che cuintri ogni tindince, a cjalin ae mont tant che a une oportunitât, plui che a un ostacul. “E somee di no – al spieghe il condutôr Lele Plazzotta (che pal passât al à vût une lungje esperience come atôr di teatri) – la int e sta pierdint cognossincis e informazions su cheste Cjargne che e vîf adalt. In tancj no san cemût rivâ intune malghe, cuâl troi cjapâ, in tancj no san che culì si fâs ancjemò formadi come une volte, o che malghis vielis a son diventadis modernis agriturisims. O crodìn di dâ un piçul contribût par splanâ chestis mancjancis”.
Tele Alto Bût è je nassude tal 1982. E prodûs i siei programs in marilenghe, te variant cjargnele, ducj i dîs de setemane, a scomençâ da lis sîs di sere. La sô programazion e cîr di contâ la vite des comunitâts dal Cjanâl di Sant Pieri. La telecjamare di Tite e filme manifestazions di paîs, documentaris di tradizions e di storie. Ma ancje dibatiments di atualitât e di politiche, scandais culturâi. Ogni cuindis dîs, un apontament fis cu la informazion, cuntun “Notiziari” e cun “CuintriCjargne”, la tierce pagjine de emitent di Paluce, curade dal scritôr Renzo Balzan.
Oscar Puntel