CULTURE – Tiere Furlane e fâs 10

Cui che nol à vivût i agns dal Friûl contadin, cun dutis lis sôs usancis e ambientazions, al à vût di sigûr un pari o un nono che i à contât di cemût che in chê volte si viveve in famee, cui gjenitôrs, cui barbis, cui cusins, e cu lis gjalinis che no mancjavin mai tal curtîl e che cualchi volte a jentravin ancje in cjase. E la miserie: i vecjos a contin simpri de miserie che ju à fats lavorâ dut il dì par rivâ a meti in taule un pocje di polente. Une vite di sigûr plui complicade rispiet a chê di vuê ma che e jere plene di moments “comunitaris”, fats di robis semplicis e creativis, parcè che vivi cun pôc ti puarte a inventâlis dutis par lâ indenant. Ricuardâ chei moments, che no tornin plui, al è come rivivi la storie dai nestris vons. Di un pôc di timp a cheste bande si pues lâ indaûr tal timp leint lis bielis pagjinis de riviste “Tiere furlane”, direte di Christian Romanini: plui un libri che un gjornâl, viodût il spessôr dal volum. Une riviste di culture dal teritori publicade de Regjon F-VJ, che e aprofondìs diviers aspiets de civiltât contadine. Cuatri numars al an che si puedin ricevi a cjase, a gratis, mandant une mail ae direzion tiere.furlane@regione.fvg.it ma che si puedin ancje discjamâ sul sît de regjon Friûl Vignesie Julie. Ogni numar al ven presentât intune serade ator pal Friûl, e la partecipazion de int e je maraveose. Centenârs di personis a vegnin a scoltâ i ospits clamâts de redazion a aprofondì cualchi teme tratât te riviste. «Ma no je int nostalgjiche dal passât – al precise il coordenadôr di Tiere Furlane, Enos Costantini –. Pluitost, o cjati personis curiosis che a àn gust di sintî a contâ dal Friûl di une volte. Nol è migo facil cjatâ ocasions par cognossi cemût che o jerin e ce che o fasevin. Tal public a son insegnants, professioniscj, zovins e mancul zovins che a scoltin atents e che a intervegnin par contâ la lôr». Lis presentazions a vegnin inmaneadis in lûcs diviers: il numar 9 al à cjatât benstâ te vecje pescjarie di Maran e il numar 10 a Spilimberc, ai 4 di Novembar. Ma Tiere Furlane no conte dome di ce che al jere il Friûl e no mostre dome lis fotos di une volte che ti fasin stâ li a cjalâlis inmagât. Il gjornâl al fevele ancje de Patrie di vuê. «Par esempli, tal gnûf numar – al conte Costantini – o presentìn un artist di Tavagnà, Giovanni Zamparo, che al fâs lavôrs une vore particolârs tal len di vecjis puartis di stalis, di cjasis e di stai di mont».
Un mont che al jere e che al va indenant. Un mont di cognossi, come che a dimostrin i “fan” di Tiere Furlane.
Note: par ricevi Tiere Furlane a cjase al baste dome mandâ la domande a tiere.furlane@regione.fvg.it cui propris dâts pe spedizion.
VALENTINA PAGANI