Sfuei Mensîl Furlan Indipendent
Archivi de Patrie

Sul troi de poesie visive

Erika Adami

La prime mostre personâl le à fate dome doi agns indaûr a Sant Pieri dai Sclavons, sburtât dai amîs de associazion Topolò/Topolove, dopo plui di dîs agns che la fotografie lu veve striât. Lis sôs fotografiis lis tignarès dome par lui, parcè che, e dîs Roberto Aita, «la fotografie e je une robe intime». Uniche concession: internet.
Il Musinf, il Museu comunâl di Art moderne, de informazion e de fotografie di Senigalie, lu met tra i «protagoniscj de fotografie stenopeiche taliane». Scuasi si cjol vie cuant che tu jal disis. Nuie di maraveâsi par un che «i plâs stâ daûr des cuintis».
Roberto, scomencìn dal «mieç». Parcè, te epoche dal digjitâl, dopristu la tecniche stenopeiche?
«Il mieç che si dopre al influìs sul risultât. Il digjitâl al da tantissime libertât, ma no il timp par pensâ a ce che tu stâs fasint, diferent de machine stenopeiche, che e je ancje la uniche che tra la pelicule e ce che tu fotografis no à un diaframe. La lûs e jentre di une buse, in pratiche la machine e respire cun chel che al è difûr».
Cuant âstu scuvierte la machine stenopeiche?
«Sù par jù dîs agns indaûr. O soi lât a fâ un servizi li di Madone des Graciis a Udin. Tal claustri de basiliche e jere la mostre fotografiche “Bambini” di Paolo Pellegrin. O soi restât fulminât: incuadraturis sporcjis, imagjinis no a fûc par mostrâ fruts, ancje in situazions di vuere. O ai provât a fâ ancje jo chê fotografie li, ma no rivavi a lâ fûr dai schemis dal reportage video. O vevi scuasi smetût di fotografâ. Po o ai viodût su un libri lis fotografiis stenopeichis di Barbara Ess. Ognidune e jere une poesie. O ai scomençât a lavorâ cu la buse stenopeiche, doprant simpri la polaroid, che e da une imagjine une vore materiche. Cul stenopeic doprât a man libare, come che o fâs jo, a son timps di esposizion une vore luncs e no tu âs il control complet di ce che al ven fûr, massime sui colôrs».
Lis tôs fotos a somein «fûr dal timp», tant che
un paisaç mentâl. Ce part àno vût i tiei studis
di lenghe e culture cinesis e filosofie?
«Une part impuartante, cussì come la vision di pituris tradizionâls cinesis e gjaponesis, tant difarentis de iconografie ocidentâl, insieme a frecuentazions cinematografichis come Andrei Tarkovskij o Alexandr Sokurov, che plui che fâ cines a fasin poesie visive».
Ce ciristu cuant che tu fasis une fotografie?
«Cuant che o decît di fâ une fotografie al è parcè che une situazion mi impressione. Le fâs di mût di rindi in chel che le viodarà une emozion, un mot interiôr. No je une documentazion di ce che o viôt jo e no à di dâ dome un plasê estetic».
Cualis situazions ti emozionino?
«La aghe, il mâr, i puescj di confin tra il mâr e la tiere, come la cueste, i lûcs là che l’om al à ativitâts che a àn a ce fâ cu la aghe. Di doi, trê agns mi interessi dai segns dal om tal paisaç contadin furlan: vecjos curtîi, stalis… O ai tal cjâf di cualchi an un progjet par documentâ lobiis e gjalinârs».
Par no crevâ il leam cu lis tôs lidrîs?
«Sì. Mê none e veve un gjalinâr, mi visi che di piçui
si leve a zuiâ cui cunins, a mateâ…».
Ce aial volût dî cressi in Friûl pe tô esperience
di om e artist?
«Mi à judât une vore il fat di doprâ la lenghe furlane. Se o ves tabaiât talian in famee o difûr, probabilmentri o varès vût une vision dal mont difarente. Ancje par chest o soi dal dut dacuardi cul promovi la lenghe furlane te scuele. Il fat di vê zirât un pôc dut il mont par vie dal gno lavôr e di vê vivût ancje in altris citâts talianis, di Rome a Torin, mi à fat tornâ a scuvierzi cierts aspiets de vite in Friûl, che, cuant che tu i sês dentri, no tu ti rindis cont».
Par esempli?
«Il rapuart cu la tiere, cu la nature, il rapuart tra lis personis intun paîs. Cumò no rivarès a vivi nancje a Udin. La vite di paîs, cui siei limits, e je un “humus”. No tu sês “bombardât” ogni dì de societât dai consums, tu âs un ritmi di vite difarent di chel de citât».
A ce stâstu lavorant?
«A cualchi progjet a lunc tiermin: une colaborazion strente cun Patrizio Esposito, fotograf napoletan che al è stât un dai miei ispiradôrs, e Martino Nicoletti, zovin antropolic che al à fat studis sul siamanesim. Une colaborazion scomençade a Topolò, te suaze di un festival che o frecuenti di cuant che al è nassût, li che o ai cognossût personis che mi àn influençât cul lôr mût di ponisi devant dal fenomen artistic, cussì difarent des dinamichis di galariis e museus. E po, dopo vê fat une mostre a Senigalie tal mês di Mai cun autôrs stenopeics di dute Italie, o stin lavorant par fâ cognossi di plui lis pussibilitâts espressivis di cheste tecniche midiant mostris e publicazions e par presentâ tal forest lis esperiencis talianis».

__________________________________________
CE FÂ
Inovazion e sperimentazion a caraterizaran “Omissis 8”, il cuart festival di spetacul contemporani, inmaneât de associazion culturâl Mattatoioscenico. 14 spetacui, dai 11 ai 14 di Setembar a Gradiscje, cun compagniis che a rivin di Italie, Stâts Unîts, Serbie, Slovenie e Spagne par continuâ a monitorâ lis formis di sene e performativis di vuê e promovi i lengaçs contemporanis: teatri, danze, musiche, design, arts visivis e grafiche. Ospits di ecezion: Rodrigo Garcia, Maja Delak e Kiki Blood. Pal Friûl a saran i Arearea. Informazions sul sît: www.omissisfestival.com

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +