Roberto Iacovissi, Il popul di Pauli di Warnefrit, Merêt di Tombe 2006
Pe golaine «I frassins» des edizions La grame, Roberto Iacovissi al publiche chest studi sul popul dai Winnili, ven a stâi i Langobarts. Popul che, cence mancul, al à ocupât un spazi une vore impuartant inte storie dal Friûl e ancje intal fâsi dal popul furlan.
Un libri di cirche 140 pagjinis scompartidis in dôs parts, la prime par furlan e la seconde inte traduzion italiane. Une trentine fra fotografiis e dissens, une schede par cui che al vûl savênt di plui, une bibliografie e une cronologjie detaiade (dal IV secul fin ae muart di Pauli, intal 799) a inricjissin il studi.
Naturalmentri il pont di riferiment al è chê grande opare (‘un capolavôr de storiografie di ogni timp’, sicu che al dîs Gianni Colledani inte sô intense prefazion) che e je la Historia langobardorum di Pauli Diacul, o ben Pauli di Warnefrit, une des gloriis di chest popul vignût cussì di lontan.
Jacovissi al jentre dentri inte anime de opare di Pauli, par analizâle ancje di ponts di viste variâts. Che la storie e vadi dispès a instreçâsi cul mît lu amet il stes Pauli, che al è ben cussient di cheste veretât. Jacovissi si domande in ce rapuart che a stan storie e mît e ce che al è daûr i mîts. Par scuvierzi, par esempli, che cierts mîts di Pauli a riclamin in maniere nete episodis de Biblie: isal Pauli che al adate lis storiis dal so popul al libri sacri dai cristians o ben isal un font di veretât in comun ae fonde des dôs tradizions? Darest, parfin inte mitologjie des isulis dal ocean Pacific dal sud al sucêt che un pescjadôr al cjapi, cul so am, la barbe dal diu dai mârs e che chest diu si inrabii tant di cuvierzi dut il mont di aghe…
Il Friûl, alore, al sarès la tiere imprometude dai Langobarts, Alboin il lôr Mosè.
Ogni grant popul si costruìs la sô mitologjie, che e nas de storie e che e je garanzie di grandece. E i Langobarts a jerin un grant popul, plui grant di ce che la storie uficiâl e à tindince di fâ crodi. Al è stât un popul vint e, sicu che ducj a san, la storie le scrivin simpri chei che a vincin. Parfin Pauli si ferme di contâ cuant che al rive intal periodi critic pe sô int. E po, sui Langobarts, al à pesât il judizi cence pussibilitât di redenzie dal pape Grivôr il grant, che al temeve, cu la lôr jentrade in Italie, une sorte di fin dal mont.
Il lavôr di Iacovissi al è interessant propit par cheste atenzion ai ponts di viste, vâl a dî che al met in lûs ce maniere che Pauli al viodeve lis opinions dal pape in cont dal so popul, fin a rivâ a distingui jenfri veretâts storichis, liendis, mîts, esagjerazions e miezis veretâts. Pauli nol dinee lis crudeltâts dai siei, e chest nus al fâs viodi intune lûs di storic une vore obietîf pe sô epoche.
Un altri aspiet di rimarcâ a son i episodis famôs de Historia che culì a son rivisitâts e tornâts a contâ. Par esempli la fuide di Grimoalt, l’impatri di Lupicis, la vuaite di Oderç e, nol podeve mancjâ, l’episodi teribil di Rumilde. Teribil, violent e scuasi pornografic inte sentence dal re Avar. Tant teribil di fâ pensâ a cualchidun (Marina Giovannelli, intal articul Romilda, in Poeti e prosatori del Friuli, editade dal Messaggero Veneto inte Vierte dal 2004, pp. 137-144) che Rumilde no sedi un personaç storic, ma une sorte di trasposizion mitiche di un fal grivi di dut il popul o ben dal so comandant.
Duncje un libri penç, di chei che a inviin tancj pinsîrs. Ancje lis inciertecis grafichis a son veniâls: a p. 50 o cjatin sedi Acuilee che Aquilee e ancje il flum al è bon di deventâ flump…
A part chest, il furlan al è un biel furlan, cult e preseôs. Il furlan che al covente par un studi di cheste fate.
Laurin Zuan Nardin
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +