CULTURE – Musicologi

Al è un biel progjet che al sta daûr ae musiche in Friûl Vignesie Julie e che al à a pene finît dîs agns. Nassût tal apartament di doi students dal Dams di Gurize, i “Musicologi” a ‘nd àn fate di strade. Vuê a son un portâl di riferiment pe musiche regjonâl, ma no dome: i progjets par “sostignî la musiche in ducj i cjamps” a son tancj. O ricuardìn, tra ducj, il documentari “Fronte del rock”, cu lis ripresis di Massimo Garlatti-Costa, la vierzidure de sale provis comunâl “Christian Forgiarini” a Glemone e il laboratori interscolastic LIISM, cul ultin spetacul “Il Suono di Pan”, coordenât di Marco Maria Tosolini. Cuâl puest che e à la musiche in marilenghe pai Musicologi, al è subit dit, cu lis peraulis dal diretôr Piero Cargnelutti: «O sin furlans di Glemone, o vin simpri vût un voli di rivuart pe produzion musicâl in marilenghe. Ma no je dome une cuestion “personâl”: o crodìn che e sedi une particolaritât une vore interessante dal nestri teritori, che si è simpri mostrât vivarôs, cuntune sene musicâl vive e svariade». Il decenâl di ativitât al è contât tal libri “Ciò che resta vale/2001-2011: Dieci anni di musicologi.com”, scrit di Cargnelutti e publicât di Audax editôr. La Patrie dal Friûl, che cui Musicologi e à organizât lis trê cunvignis “Notis su notis”, ur fâs tancj auguris!
Natascia Gargano