Sfuei Mensîl Furlan Indipendent
Archivi de Patrie

Minorancis linguistichis e resistence. Friûl-Vignesie Julie, Italie, Europe

Federica Angeli

Joibe ai 8 e vinars ai 9 di Mai stâts si è davuelte a Udin, li di palaç Kechler, la cunvigne Minorancis linguistichis e resistence. Friûl-Vignesie Julie, Italie, Europe organizade dal Istituto friulano per la Storia del Movimento di Liberazione cul jutori de Regjon Autonome Friûl-Vignesie Julie e il patrocini de Regjon Piemont, de Universitât dal Friûl e la Fondazione CRUP.
Il program di chescj doi dîs al è stât pardabon siôr di intervents di alt nivel che a àn profondît tematichis difarentis. Intes dôs zornadis àn partecipât sedi studiôs di chenti che de Val d’Aosta, de Catalogne, dal Paîs Basc, de Ocitanie, de Slovenie e de Istrie.
Dutis lis relazions de prime zornade a àn frontât la “cuistion de lenghe” tal periodi dal fassisim e de lote di liberazion. Si è partîts de Val di Aoste cun Paolo Levi Momigliano, che al à spiegât benon ce rûl che e à vût la cuestion valdostane sedi durant de vuere, sedi durant dai lavôrs de Costituent. Si è passâts daspò dilà dal confin cu lis relazions di Nevenka Troha sul antifassisim, la Resistence slovene e la difese de lenghe slovene, e di Mila Orlic su lis comunitât nazionâls in Istrie jenfri fassisim e il daspovuere. Infin Donato Toffoli e William Cisilino a àn frontât plui tal detai i temis furlans cui lôr intervents su la lote di liberazion e la cuestion furlane, e la repression des lenghis minoritariis sot dal fassisim.
La seconde zornade si è vierte cuntun aprofondiment di Marco Stolfo su la Carta di Chivasso, su la storie de sô stesure, ma soredut su la sô ereditât. Guglielmo Cevolin daspò al à fevelât de tutele costituzionâl des minorancis linguistichis tant che strument di integrazion europeane. Santiago de Pablo e August Rafanell invezit a àn puartât la cunvigne sul plan internazionâl cu lis lôr relazions sul percors fat de de lenghe basche e di chê catalane sot dal franchisim, e dal status che e àn in dì di vuê.
Forsit pe prime volte il teme de Resistence al è stât frontât da un pont di viste gnûf o almancul, no convenzionâl. Par solit, cuant che si fevele di Resistence, no si lee chest argoment cun chel des minorancis. Anzit ancjemò in dì di vuê, une vore dispès e massime in Italie, la cuistion dal ricognossiment dai dirits des minorancis linguistichis je considerade un argoment reazionari e esclusîf dai partîts di drete. Il valôr zontât de cunvigne al sta propit tal vê marcât la atenzion che la Resistence e à simpri vût pes autonomiis e culturis locâls.
Sience Furlane par television
Dilunc di dut il mês di Mai ogni domenie matine su RAI3 aes 10.15, dentri dal spazi dedicât aes trasmissions regjonâls, e je lade in onde la trasmission “Sience Furlane”, il prin esperiment televisîf di divulgazion sientifiche in marilenghe: une vere novitât te ufierte televisive in lenghe furlane.
La cualitât de trasmission e je stade pardabon di alt nivel, in gracie de colaborazion cu la Societât Sientifiche e Tecnologjiche Furlane (SSTeF) che e met adun docents, professioniscj e ricercjadôrs che si interessin di sience e tecnologjie, di cemût che si disvilupin e che a pandin i risultâts dai lôr scandais doprant la marilenghe.
In chestis cinc pontadis, Giorgio Cantoni al à intervistât un espert de SSTeF par presentâ ogni volte un argoment difarent. Ospits e temis di ogni pontade a son stâts presentâts di Giusy Gubiani.
Si è fevelât cussì di realtât virtuâl cul inzegnîr Domenico Visintini, di meteorologjie cui dotôrs Fulvio Stel e Dario Giaiotti, di siencis bilogjichis cui professôrs Romano Locci e Enrico Peterlunger e di neurosiencis cul professôr Franco Fabbro (da pît dal articul si cjatin i titui des pontadis e lis zornadis di metude in onde). Cun di plui, in sierade di trasmission a son stadis dadis bibliografiis e sîts Internet, informazions une vore utilis par ducj chei che a àn gust di profondî i argoments tratâts intes intervistis. Un progjet origjinâl ancje pe sô ambientazion: lis pontadis a son stadis ziradis intune librarie di Udin.
Il bon risultât de trasmission però al è cence dubi leât ancje al lengaç doprât. Tal scrivi i tescj Pauli Cantarut al à doprât une lenghe une vore curade e contemporanie, insiorade di chei neologjisims e di chê terminologjie specifiche che a coventin par fevelâ di sience e di gnove tecnologjie.
Cun chest esperiment al è stât dimostrât une altre volte che la lenghe furlane e je adate par fevelâ di cualsisei argoment, ancje di chei plui modernis tant che lis siencis. Cun Sience furlane si è fevelât a un public vast di argoments che, magari cussì no, a son pôc cognossûts: si pues dî che la sfide e je stade vinçude.
CALENDARI DES PUNTADIS:
Viaç in 3D te Basiliche di Aquilee, interviste a Domenico Visintini; Fenomens meteorologjics violents e cambiaments climatics, interviste a Fulvio Stel e Dario Giaiotti; Il cancar dal cjastinâr e lis curis biologjichis, interviste a Romano Locci; Storie de vît in Friûl, interviste a Enrico Peterlunger; Sintiments religjôs intal çurviel, interviste a Franco Fabbro.

Lenghe minoritarie / FluxJudri25 – Giassico

Redazion
Conferece “Lingue minoritarie: le capitali della cultura e il rilancio del territorio” . A son intirvignûts Elena Gasparin, Dree Valcic president de Clape di Culture Patrie dal Friûl, Eros Cisillino president ARLeF, William Cisillino diretôr ARLeF, l’On. Guido Germano Pettarin e il coletif Lis Tarlupulis. FluxJudri25.Ca sot l’intervint di Valcic. lei di plui +

L’EDITORIÂL / Un Friûl disarmât

Walter Tomada
Lant ator pe Italie dispès al capite, cuant che si dîs di jessi furlans, di cjatâ int che nus dîs “Ah, mi visi dal Friûl! O ai fat il militâr a Udin!”. Prin dal taramot, un abitant su dîs chenti al jere un soldât e cheste ereditât di “tiere di primulis e casermis” se puartìn […] lei di plui +

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

5 Par mil / DANUS UNE MAN

Redazion
5 PAR MIL – Ancje chest an, cu la declarazion dai redits tu puedis dâi une man a La Patrie dal Friûl, il mensîl dut in lenghe furlane dal 1946. Nol coste nuie, baste meti il numar 01299830305 te casele juste: Sostegn dal volontariât e des altris organizazions no lucratîvis di utilitât sociâl, des associazions […] lei di plui +