CULTURE – MEDITANTLIS TAL SO CÛR. Preparatîfs in cîl

Come in ogni famee che si rispieti, ancje in cîl a stan fasint i ultins preparatîfs.
Chê altre dì al è nassût un frut in paîs e il pari ur à dit ai amîs: «Par plasê, no stait a rompi»; la mari, distudade la television, e stave in compagnie de creature che e tignive cun afiet tal grim.
Cussì al è cumò in Paradîs: a tasin i sants, i agnui a àn metude di bande la musiche e la danze, i cherubins no movin lis alutis e i serafins nancje no tirin flât.
Là sù, la famee e je dade dal Pari, Fi e Spirtu Sant. Spirt, in ebraic al è feminîl e duncje la cuote rose e je ancje in cîl.
A stan fasint consei; e je di mieç une grande decision: la nassite dal Diu tra di nô. Il Pari, mandant il Fi tra lis miseriis de tiere, al volarès consegnâi l’univers intîr, ma un frutin che al nas al pues tignî in man sì e no une scjatulute; i donarès il cîl pontât di stelis, lis rosis dai plui biei zardins, il cjantâ melodiôs dai ucieluts e il slusignâ des ondis dal mâr che nol à fin… Ma in chê valisute nol sta nuie e il Pari al sentenzià la decision: Nût o ai fat il prin om e nût o mandarai gno Fi tal mont.
Il Fi al cjale la glorie sflandorose de sô cjase; al capìs che cumò al sa dut, ma deventât om al savarà cuasit nuie, cumò al pues dut e nol podarà nuie, e lui che al è la eternitât lu glotarà la muart: robis di fâ sgrisulâ e cîl e tiere. Rivaraial a vinci une tâl tremende prove?
Il Spirtu Sant al cjale il Pari e il Fi: al è lui che ju ten unîts tal amôr ma l’amôr in tiere al à il colôr dal sanc, la spine dal pecjât e il riscjo di falî: ancje il plui grant afiet al pues mudâsi in odi e delusion.
A contin che in chê gnot, la gnot di chel Nadâl, propit a miezegnot cuasi a dividi il timp, e comparì tal cîl, ma tun marilamp come tal prin Big Bang, une imense lûs che e fo glotude a colp dal scûr.
Il contrari de creazion dal mont. In chê volte Diu al veve dit: Che e sedi la lûs par mandâ vie la gnot. Cumò al disè: Che il scûr al gloti il dì. E e fo la gnot di Nadâl: l’Amôr eterni supât tun cuarp mortâl e deventât dutun cun nô.
Al Fi di Diu, al Diu-cun-nô, no i è ladi ben. Nassût intun sierai de periferie, al sarès finît cui vuarps, cui çuets, cui disabii, disgraciâts, psichiatrics e sbandâts e i grancj dal mont lu varessin picjât sore une crôs. Al dîs Sant Pauli: «Crist, jessint Diu par nature, nol à ritignût un ben di no molâlu il so jessi compagn di Diu, ma si è ridusût a nuie cjapant sù la nature di sotan e deventant compagn dai oms; comparît in forme di om, si è sbassât inmò di plui fasintsi ubidient fint a la muart e a la muart di crôs». (Fil. 2,5-8)
E scrîf Edith Stein: «Une vore di lôr a volaressin vuê fâ tasê la Crôs. Ma nuie al berle plui fuart de Crôs metude a tasê! Il vêr mes dal dolôr al è une lezion di amôr. Al è l’amôr che al fâs florî il dolôr e il dolôr al mene al colm l’amôr».
Al rive Nadâl; al è facil strenzi e niçulâ un bambinut di plastiche o di tierecuete, lassâsi comovi des neniis e lusutis di Nadâl e scambiâsi intal clip flocuts e regaluts; al è tant plui dificil lâ a cirî il Signôr glotût, sfinît e e svinidrît des tragjediis de vite e lassât in bande a patî di bessôl.
No soi contrari al crocifìs te scuele, ma o sai ancje che chê figure de crôs no salve propit nuie. Gjesù vignût dal cîl nol è ni tun tocut di len ni tun pipin di zes ma inte tremende gnot dai tribulâts.
Bon Nadâl. Ma cun cui, ma dulà. Dongje di chel che al tuche e al zem, tune animele che e lûs di vêr amôr.
pre Tonin Cjapielâr