CULTURE – Mandi Miklos Hubay

Nus à lassât in Mai, in ponte di pîts Miklos Hubay. Nassût a Budabest tal 1918, ancje se nol veve sanc blu tes venis, al veve un caratar aristocratic tipic dal imperi austroungaric.
Dilunc de Seconde Vuere Mondiâl al jere a Gjinevre diretôr de riviste “Nouvelle revue de Hongrie”, che e fo catalizadôr di fuarcis inteletuâls de Resistence.
Al à insegnât te Academie di art dramatiche di Budapest (1948-54), te Universitât di Florence (1974-88) e al jere stât president de Associazion dai scritôrs ongjarês (1982-87). Al jere un om di minorance come che lui stes si veve descrit: «O soi nassût a Nagyvarad in Transilvanie tal moment che e passave cu la Romanie e intant che la epidemie spagnole mi robave gno pari. O jeri minorance e vuarfin. Cemût no podevio jessi segnât di dut chest?»
Il Friûl al à di ricuardâlu par chel leam che al veve cun Danilo De Marco, fotograf di Udin, ma no dome. Cemût no visâsi ancje di “In fin il cidinôr”, il dram gjavât fûr di un so vecjo manuscrit e voltât par furlan di Federico Rossi? La opare e puarte in sere la muart di une lenghe. Rapresentât ai Colonos, al mertarès di jessi tornât a proponi magari propit in omaç a cheste grande vôs che cumò e je lade incuintri al grant cidinôr.
Redazion