CULTURE – La poliedricitât di Lussia

Lussia di Uanis e je une des figuris femininis plui esplosivis dal Friûl contemporanei; poete, pitore e  atore e à za publicât diviers libris, colaborant cul coletîf poetic dai Trastolons e cul grup Kramars jenfri i tancj. Eletrike Skeletriche Poetiche al è il progjet di cjant, musiche eletroniche e improvisazion metût adun cui doi polistrumentiscj «Pelle» e «SunDruThi».
Dal pont di viste musicâl chest disc al è cuinçât di atmosferis decadentis, tension e oscuritât emotive e al ripuarte ad implen il teatrin metalic dês lôr une vore origjnâls esibizions dal vîf, dulà che Lussie e devente une inconsapevule sacerdotesse de gnot, adun cun Pelle Sundruthi tant che figurants scalembris.
Jenfri i tocs plui significatîfs di chest cd us segnalìn «Bambini»: senaris di vecjis e gnovis vueris, dulà che une dolce e malinconiose naine (e jo o cjanti cjanti cjanti…) e lasse il puest a une esplosion di violence musicâl e verbâl. «Resistenza» e je, invezit, une riflession su chel che ognidun al podarès jessi e fâ par sintîsi plui responsabil di dut chel che al sucêt intor al so piçul mont. «All stars slozze» e sotlinee il peam cu la nature e la mari tiere. «Quando» dal pont di viste musical al è l’episodi plui solâr, cuntun loop reggae e tapets eletronics che a fasin sintî lizêrs par dut il toc.
E merte pardabon une segnalazion ancje la fantastiche cuviertine serigrafade a man, valôr zontât che al complete une piçule opare di art.
Chest prim lavôr dai Eletrike Skeletriche Poetiche nol è sigurementri di facile scolte, ma nus fâs cognossi un pôc di plui Lussie, un personaç estremementri vitâl e al stes timp une vore fragjil. Dut câs maraveosementri vêr e trasparent.
(Mojra Bearzot)