No, no stin cjacarant di fâ cjacarâ par furlan une interie citât irlandese, ma di dute une altre robe.
Il “limerick” forsit no ducj a san che – come il plui nomenât haiku – al è une forme poetiche une vore curte cuntune struture fisse, par solit cence sens e di nature licenziose.
Par jessi plui precîs, un limerick al è fat di 5 viers, di chescj i prins doi e l’ultin a son in rime, cussì come chei altris doi (ancje se al gambie il numar dai acents, che a àn di jessi trê e doi). Chest al puarte a une struture poetiche di cheste fate: AABBA.
E nol è dut! Un limerick, par no vê ecezions, al à di poni subit inte prime rie il protagonist, un adietîf che lu definissi e il lûc de sô provenience. Dificil?
Dome tal inprin, parcè che dopo e je dute cuistion di esercizi, e se o provais a pensâju par furlan o scuvierzarês che a podìn vignî ancjemò plui facilmentri.
Ma viodìn subit cualchi esempli, par sclarîsi.
Provìn, par gust, a voltâ un limerick di Gianni Rodari, che ‘nd à scrits plui di cualchidun, cirint di doprâju ancje par insegnâi a fruts e componi storiis, meti dongje rimis e dividi in silabis.
Une volte un miedi di Bicinins
Al gjavave lis tonsilis a moscjins
Ma une bestie si è voltade
E la nape i à becade
A chel miedi tonsilarin di Bicinins
Po dopo, cjalant di dulà che chest componiment al rive, provìn a cjoli un limerick di Edward Lear, poete famôs ae fin dal Votcent ancje par chescj.
La versione furlane di un so limerick e podarès jessi cheste:
Al jere un vecjo di Vissandon
Cul cjâf pôc plui piçul di un boton
Cussì par someâ plui grant
Al comprà un parucon gjigant
E dopo jù a rondolons par Vissandon!
Insome… a bastin chescj piçui componiments par mostrâ cemût che daûr di une maniere une vore semplice di fâ poesie, si puedi platâ un imprest che, intune lenghe come chê furlane – par sô nature storiche doprade ancje par ridi o cjoli in zîr – al rint une vore ben e al pues jessi doprât sedi par divertiment, sedi par finalitât didatichis e linguistichis.
E no stait dî che no us è vignude voie di provâ…
Raffaele Serafini
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +