CULTURE – I pierçui di Flumisiel

Al è un paîs inte Basse furlane, che al è une vore famôs pai siei pierçui: o fevelìn di Flumisel, dongje Aquilee, che al sta intune buine posizion e cuntun teren che al è in pratiche l’ideâl par fâ vignî sù arbui di pierçui bogns e nostrans.
Flumisel al rapresente la plui grande realtât furlane di coltivazion di pierçui, cui siei 79 etars. La particolâr bontât e gust dai pierçui di Flumisel, si à parcè che a vegnin tirâts jù dal arbul cuant che a son bielzà madûrs, cence manipolazions o problemis di traspuart, dal moment che il lôr marcjât al è massime locâl.
A Flumisel a esistin plui di un centenâr di varietâts, ma a esistin almancul trê tipologjiis “storichis” di pierçui. O fevelìn dal Iris Rosso, de Triestina e de Isontina (a proposit dai nons, cjale il box sot, ndr). La prime e à la polpe blancje cun cualchi strissule rosse, e pese plui o mancul un et e 30 grams e e madrès ai prins di Lui. Chest pierçul al à la polpe avonde fisse e cuntun bonissim savôr.
La varietât Triestine, invezit, ancje se e à lis stessis carataristichis de varietât Iris rosse, e je difarente parcè che e madrès a metât dal mês di Lui.
La varietât Isontine e à invezit la polpe zale, avonde fisse, e e je plui gruessute, parcè che e pese cuasi doi ets, e e madrès ae fin di Lui.
Iris rosse, Triestine e Isontine tra lis altris robis a àn vût il ricognossiment dal Ministeri come varietâts metudis dentri te liste dai prodots agroalimentârs de nestre Regjon.
Jessint che Lui al è il mês dai pierçui, no podeve mancjâ a Flumisel la Fieste Regjonâl dai Pierçui. Al è ormai dal 1959 che là jù le puartin indenant; dongje de fieste popolâr, che aromai e fâs vignî jù a Flumisel tancj passionâts di dute la regjon, inte fieste, che e je une vere vetrine par chest gjenar di produzion.
Par chest an, ancje la fieste dai pierçui di Flumisel si presente cul vistît dal Tipicamente friulano «propit par fâ viodi che lis nestris produzions – al dîs l’assessôr regjonâl aes risorsis rurâls, agroalimentârs e forestâls Claudio Violino – a son di grandissime cualitât e che e vâl la pene di fâ viodi a ducj, no dome ai nestris coregjonâi». Tant par dî che il nestri prodot al vâl la pene di jessi fat cognossi ator pal mont!
Cinzia Collini