CULTURE – Homo Furlanus… e la felicitât?

LA FELICITÂT E I FURLANS_ Nus disevin i Antîcs che il sens de vite al sta tal cirî la felicitât. Nus disevin che ducj si lambichin par brincâle. Ma ise cussì ancje pai furlans? Di sigûr i furlans, come ducj i oms, a scombatin par grampânt un fruçon ma, a diference di altris popui, no doprin mai la peraule “felicitât”. Parcè? Isal un câs? O si puedie cjatâ une reson? Che al sedi un indizi di un mût di viodi la vite? Di cheste osservazion a son partîts Alessandro Di Pauli (ricercjadôr, regjist, atôr e scritôr di tescj teatrâi e Tommaso Pecile (inzegnîr, ma sposât ae scriture teatrâl e ae recitazion) par burî fûr une “mini serie” televisive (6 pontadis di 30 minûts ognidune), sul “homo furlanus” e la sô strade viers la felicitât.
LA SERIE TELEVISIVE_ Cuntun grop di altris furlans (ducj sot i 35 agns, la plui part emigrâts fûr Regjon), Di Pauli e Pecile a àn pensât a un prodot vivarôs e riflessîf tal stes timp, che al à cjapât il non di “Felici, ma furlans”. La serie, su regjie di Thomas “Uolli” Marcuzzi e Ernesto Zanotti, insiorade de colone sonore de Orchestrina Tascabile Démodé, «e ven fûr da lis nestris sachetis», a disin i autôrs, ven a stâi realizade soredut cun finanziaments privâts. Metût su Internet il promo al sta spopolant in rêt, merit ancje de sottitulazion par furlan, talian, spagnûl, inglês, francês e triestin, par permeti plui facilmentri la sô “esportazion”. E grant sucès e à vût ancje, di resint, la presentazion “Live” (“dal vîf”) al Friuli DOC.
L’INTENT_ Intun caleidoscopi di atôrs e tematichis si movin sul schermi vecjos rimpinâts ae tradizion, ma cul cûr ingropât, zovins inçussîts dal benstâ che no cognossin la fadie, segretaris ruspiosis e operaris di colôr, sotans e parons, ducj tirâts dongje par contâ il conflit sociâl tra siôrs e puars, la gnove emigrazion, il scuintri gjenerazionâl tra la int dal timp de vuere, chê dal taramot, pronte al sacrifici, e chê di vuê, usade ae plene libertât. L’intent? Fevelâ de “furlanetât moderne” cui mieçs de comicitât, cuntun lengaç fresc che al messede i tons vivarôs dal bar a chei standardizâts de koinè; fâ e disfâ stereotips di un Friûl simpri plui globalizât, che al cjale indenant, cence dismenteâ il passât.
Par savênt di plui su la serie, fracait sul sît www.felicimafurlans.it. e scuvierzêt se pardabon si pues jessi “felici” a dispiet dal sedi furlans o se i furlans a puedin jessi “felici”, magari intun “furlan way”! (I. C.)