Lis lidrîs, la culture de sô tiere a àn vût, su la sô art, «la stesse influence che al à il lat de mari sul so frut», no par chest, al dîs Franco Del Zotto Odorico, «la mari i à di dâ di lat par simpri». Ma chel leam profont, cu la tiere di origjin, nol ven mai mancul tes oparis dal artist furlan. Te sculture resinte «Acquido cantico», te place di Rividiscje, paîs dulà che al è vivût, Del Zotto Odorico al à lavorât su la idee dal poç, une volte pôl di atrazion de int. Il poç, duncje, tant che simbul di identitât, che al met adun e al vuarde la storie, il passât. E a relazionâsi cu la storie e je ancje la peraule scrite.
Franco, un grum des tôs oparis a son leadis ae scriture. Parcè?
«Il mont di vuê al abuse dal colôr e des imagjinis. L’ûs de peraule te art al devente, duncje, un codiç par tornâ indaûr a chel segn ontologjic istintîf che al fâs part dal om; chel segn che al ven dal istint, dal desideri di comunicâ e si materialize tal at dal om. Il verp incidût al è tant che «berlade delicade», al mostre la esistence di un jo, al è ricercje di dialic, di comunicazion. Il verp al da tante plui libertât di interpretazion e al da la pussibilitât a cui che le vîf di continuâ la opare di creativitât dal artist».
Te art contemporanie dispès si favorìs une rapresentazion virtuâl de realtât. Tu tu proponis la peraule scrite par «dâ rilêf – tu âs dit – a une proprie storie identitât». Ce ise par te la identitât?
«Il probleme dal virtuâl nol è dome de art. I dâts fals si àn tai rapuarts di ogni dì tra lis personis, sedi tal mont dal lavôr, sedi te politiche e tes relazions plui superficiâls, chês leadis a internet, a facebook…
Il virtuâl al è cirût no par une necessitât di creativitât o fantasie, ma par imponisi su chel altri. O vivìn une globalizazion sociâl, che e somee democratiche, ma che e à dome chê di splanâ la societât. Jo o crôt tes diferencis e te necessitât di rispietâ chestis diferencis. No te imposizion de proprie culture. O crôt tal rispiet e te scolte di chel altri. Se la scolte reciproche e prodûs creativitât e libertât di creativitât, tu sintis che chel che tu produsis nol è plui dome part di te, ma part de comunitât che ti à domandât une opare. Tal moment che la comunitât e torne a cjatâ un teren dulà ricognossisi, tant che te opare, si à un procès di identificazion che al prodûs energjie vitâl, che e fâs continuâ, e cambiâ, la creativitât de opare. La identitât, duncje, no vûl jessi une imposizion ideologjiche, ni culturâl, ma un pont di incuintri di vitis diferentis cuntun percors unic di vite comune».
Âstu mai pensât di doprâ viers o frasis in lenghe furlane tes tôs oparis?
«Sigûr, ma fin cumò nol è rivât il moment di doprâle. Dispès al è il riscjio di colâ tal banâl e tal retoric.
La sielte de lenghe no à di jessi fine a se stesse».
Ce pensistu de art contemporanie furlane? Sono spazis bogns pai artiscj chi in regjon?
«Se e je une art contemporanie furlane, jo di sigûr no i fâs part. Par vie di une probleme gjenerâl di identificazion di ce che e je l’art e di cualis che a son lis imposizions des galariis di ponte fûr regjon, pe impussibilitât detade dal no apartignî a cualchi lobby locâl che ti sburti. A rivuart dai spazis, al è un ciert ferment in regjon, ma al è dificil par un artist jentrâ in chei spazis. Ancje chest, cun dute probabilitât, al è un probleme di identitât».
A ce progjets stâstu lavorant?
«Cumò o stoi lavorant a un concors vinçût par une instalazion di fâ a Codroip. Al è un basrilêf dilunc de façade in viste de vecje casermute Moro, di trente, cuarante metris sù par jù.
O doprarai la stabilidure, no plui il metal, e la architeture dal verp e sarà di impronte didatiche. Lavôr ancjetant impegnatîf e similâr te realizazion al è l’intervent dedicât a Tina Modotti, tal centri storic di Udin, che o consegnarai in curt».
ARTIST ECLETIC_ Nassût a Codroip tal 1960, diplomât li de scuele di restaur di Vile Manin di Passarian e soci Icom-Unesco, Franco Del Zotto Odorico al è libar professionist tal setôr de conservazion des voris di art. Autôr di articui e saçs tecnics e teorics su rivistis di restaur e di storie de art talianis e forestis, al à cjapât part tant che relatôr a cetantis cunvignis internazionâls. Tant che pitôr al à partecipât a mostris personâls e coletivis fin dai agns Setante, in Italie e tal forest. Artist ecletic, al unìs piture, sculture, fotografie, instalazions, doprant tecnichis difarentis par rivâ a une sintesi di forme e contignût. Al à fat instalazions ispiradis a tescj poetics di Pier Paolo Pasolini e David Maria Turoldo, metudis in spazis publics, e dôs oparis pe glesie de Trasfigurazion di Parme: l’Arbul e la Scjale de Trasfigurazion. Tal 2005, l’artist al à cjapât part ai events colaterâi de Bienâl di Vignesie, tant che progjetist e autôr di une machine distributore di voris di art.
Erika Adami
________________________________
CE FÂ
134 pituris, che a rivin di museus di dut il mont, in mostre a Vile Manin di Passarian fin ai 7 di Març dal 2010 pe gnove mostre, par cure di Marco Goldin, «La etât di Courbet e Monet. La difusion dal realisim e dal impressionisim te Europe centrâl e orientâl». Fin al prin di Novembar e je vierte des 9 di matine aes 7 sot sere. Dai 2 di Novembar, des 9 di matine aes 6 sore sere, di lunis a joibe; vinars, sabide e domenie des 9 di matine aes 7 sot sere. Informazions al numar 0422.429999.
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +