CULTURE – ART-Â. La culture furlane tra passât e presint

Contâ la vite a traviers dai ogjets.
E no dome. Bramât di un toc, il Museu etnografic dal Friûl – viert ae fin di Otubar – al fâs fâ ai visitadôrs un viaç dentri de culture tradizionâl furlane midiant di une schirie di imprescj, documents, fotografiis, tra passat e presint, e filmâts. Il progjet di une realtât museâl etnografiche, che Gaetano Perusini, sostignût de aministrazion comunâl, i veve dât cuarp tal 1963 tai spazis di palaç Maniago in vie Viole a Udin (si clamave Museu furlan des arts e tradizions popolârs), si torne a presentâ rignuvît in cualchi impostazion di fonde, tal percors e tes potenzialitâts dai spazis intun dialic costant cui visitadôrs (domandantjur ancje di indicâ cemût che si clamin par furlan ciert imprescj), comprendûts chei plui piçui in gracie di une ativitât didatiche vivarose.
La mostre si disvilupe sui trê plans di palaç Giacomelli tal borc di Graçan cun percors stabii a teme, spazis che a cambin, une sale pes esposizions tematichis e une aule didatiche. La idee e je chê di continuâ te ricercje, slargjant simpri plui ancje la racuelte di bens no materiâi, ven a stâi narative orâl, cjants popolârs, storiis di vite e vie indevant. Po, par che il Museu nol deventi un templi di nostalgjiis, si cirarà di meti in pîts une rêt di «network» cun realtâts similârs in Italie e tal forest.
Lis racueltis – insioradis tal timp cun cetantis donazions, massime chê di Andreina Ciceri tal 2000 – a presentin materiâi di ogni fate e divignince e di ete diferente, di mût di piturâ un cuadri complessîf rapresentatîf dal teritori furlan, des sôs peculiaritâts. Si tache, al plan tiere, cuntune leture simboliche dal fûc, che si svilupe ator dal concet di fogolâr par tocjâ rîts e fiestis leadis a chest element. Al prin plan si va su lis olmis dal sacri. Des formis e dai segns de devozion si passe ae part dedicade ae medisine popolâr, ai vuaridôrs cu lis jerbis e ae chirurgjie di une volte, po une cerce di doi moments impuartants dal vivi in comunitât: la musiche e il zûc. Intune sale di pueste la proiezion di un video al conte il borc di Graçan, vignût sù dulinvie de roie, cu lis sôs cjasis borghesis e chês leadis ai mistîrs dal artesanât. Bielon il secont plan dal palaç, li che si viodin i risultâts des ricercjis di Perusini e Lea D’Orlandi sul costum popolâr furlan. Achì si va insot tes formis dal vistî tradizionâl passant par materiis, imprescj e cognossincis leadis ae filadure e tiessidure, in gracie ancje di un biel video cun testemoneancis. I filmâts a son pardabon un pont di fuarce dal Museu. A judin a cognossi miôr cierts argoments – des tradizions di Carnevâl ae emigrazion tra Votcent e Nûfcent – e lu fasin, dispès, in lenghe.
Erika Adami