CULTURE – ART-Â. Art, design e tecnologjie che a nassin dal ricicli

Dut al partìs de idee che “sostenibil al è biel”, che la bielece dal inzegn, dal fâ e dal pensâ riciclant e prodûs design, tecnologjie e art. Cussì, cun cheste filosofie, al è nassût “BluLab”, un spazi dulà che, scomençant di materie e materiâi, si vierzin confronts e relazions tra monts diferents: de ecologjie ae produzion industriâl, de art al design, des siencis aes tecnologjiis, de formazion ae comunicazion. Un lûc viert ai fruts, e no dome, in vie Pradaman 21 a Udin, dulà zuiâ cui materiâi insiemi a gjenitôrs e compagns di scuele e scuvierzi intune mostre il cicli di vite di lens, veris, metai, plastichis, cemût che a mudin, cul jutori de tecnologjie, intun prodot finît e in ce maniere doprâ i scarts des lavorazions cence butâju vie, si ben trasformantju in robis gnovis, tant che un libri o un tapêt. La idee e je chê di imparâ a viodi ogni robe produsude no tant che un refudon futûr, ma tant che un materiâl che si pues tornâ a doprâ intun cicli che no ‘nt cambie lis cualitâts, tant che al sucêt tal ricicli tradizionâl.
Il “BluLab”, screât sabide ai 27 di Fevrâr, al cjape il non dal colôr dal cîl e dal mâr, il colôr de sostenibilitât. Lu puarte indenant la associazion culturâl Modidi in convenzion cul Comun e la Universitât di Udin (par vê informazions si pues clamâ il numar 0432/900656 o scrivi ae direzion mail: modidi@modidi.it o lâ a dâ un cuc al sît: www.modidi.it), in continuitât cui progjets di educazion ae art e ae creativitât e al svilup sostenibil puartâts indevant tai agns di Modidi e dal Centri ReMida di Vile Manin di Passarian.
Incuintris, laboratoris, mostris a ciraran di sensibilizâ al teme de sostenibilitât, che al è un mût di vivi, di produsi e di consumâ, che, a traviers dal ûs des materiis primis e des risorsis energjetichis, tal plen rispiet de persone, al vûl sodisfâ i bisugns di vuê sigurant la disponibilitât des risorsis aes gjenerazions che a vignaran.
In cheste suaze, si zonte ancje il progjet de prime bancje dâts taliane di eco-design dedicade ai materiâi riciclâts e al lôr ûs tal mont de produzion e dal design: un imprest, ma prin di dut un servizi che si indrece a aziendis, libars professioniscj, designer, universitâts, centris di ricercje pal svilup di prodots e servizis sostenibii.
Erika Adami