CULTURE – AGRICOLTURE. La vacje Flore che a clamin “taliane”, ma che e je furlane

Dai 3 ai 7 di Mai Udin e sarà par une setemane la capitâl de “Pezzata Rossa Italiana”, raze bovine che e sta vuadagnant simpri plui preseadôrs tra i arlevadôrs di dute Italie (massime tal Nord Est), sedi pe sô robustece, sedi pe sô versatilitât.
Une cunvigne cun ospits internazionâi (intervents e seminaris tal auditorium dal palaç de Regjon, ma ancje visitis te aziendis, tal Centri di Fecondazion Artificiâl di Morùs e al teritori) che, in realtât, nol è altri che un tornâ a cjase: parcè che il non uficiâl par leç di “Pezzata Rossa Italiana” al esist dome dal 1985, e invezit prime si fevelave di “Vacje Beletade” o “Vacje Flore” (par talian la “Pezzata Rossa Friulana”), stant che cheste raze e je frut de maestrie dai nestris contadins furlans.
Bielzà dal Votcent, par vê bestiis plui fuartis di doprâ tai cjamps e buinis di produsi sei lat che cjar, a son stâts i alevadôrs furlans a miscliçâ lis lôr vacjis autoctonis (chês fromentinis de plane furlane) cun taurs di altris razis (lodigjans, maranês, friburghês e, parsore dut, de raze “Simmental”), fin a rivâ a selezionâ cheste vacjute cuiete e produtive, cui vues solits, rustiche tes pretesis, svelte a cressi e buine di dâ cjar o lat di cualitât (bon par fâ formadi), cun chel carateristic pêl (ros clâr te schene, blanc te muse e te talpis, che par furlan si clame propit “flôr”).
La cunvigne di Udin – promovude de Associazion dai Arlevadôrs di Pezzata Rossa Friulana (A.N.A.P.R.I.), che e à la sô sede propit te capitâl furlane (in vie Nievo 19, tel. 0432 224111, www.anapri.eu) – chest an e rive ae sô 29me edizion, a testemoneance di un lavôr di 30 agns di ricercje e svilup di bande dai arlevadôrs, che al à permetût a cheste raze di passâ di 10 mîl bestiis (iscritis tal Libri Gjenealogjic talian) tal 1970 , a lis 60 mîl di vuê, cun tun nivel di produzion di lat plui che dopleât (di 3000 kg a 6500 kg, mantignint simpri la cualitât dal nivel di gras e proteinis). Risultâts che forsit no fasaran mai competi la Vacje Flore cun altris razis di ecelence pe cjar (come la Limousine) o par il lat, ma che di sigûr – cirint di fâ ancjemò miôr, lavorant su la ricercje sientifiche e su lis tecnichis di arlevament plui adatis – a confermaran di sigûr cheste raze come une des plui preseadis par l’arlevament di cualitât in scjale grande.
Margherita Timeus