Sfuei Mensîl Furlan Indipendent
Archivi de Patrie

TELEVISION, CINE E TEATRI. FRIÛL TAL ETERE. Reality furlan

............

Ancje il Friûl al à il so “talent show”, chei spetacui un grum americans e un grum popolârs, dulà che cjantants, balarins, presentadôrs e comics si esibissin, par solit denant di une comission, e a mostrin la lôr art. E po i judiçs a decidin: o dentri o fûr. Tal câs specific, la gare e je dute jenfri grups musicâi furlans, 4 grups ogni domenie: la trasmission e va in onde su Free, des 10 sot sere. “The Groove Factory Contest 2011” – chest il so non – al à za preselezionât 24 bands, che si disfidin e a cjapin i vôts. E la jurie e je imbastide traviers di un sisteme mist, proporzionât: internet, sms e jurie.
LA SCUADRE DAL PROGRAM_ Par vêr, il formât dal program nol è une gnove. Trops reality esistino su la television taliane? Ma si pues ben definî, il prin talent show imbastît a nivel locâl in mût struturât e seont i criteris dai grancj programs, no ae buine. Un reality locâl che nol à nuie ce invidiâ ai grancj reality, a part i coscj contignûts. Su Telefriuli, si veve viodût, aromai plui di dîs agns za fa, une sorte di “Grande fratello”, cun Mandi Mandi e personaçs di paîs, ma e jere une robe un pôc sfuarçade, scuasit teatrâl e masse farloche. Chi invezit, o vin il premi finâl vêr, il regolament rigjit, lis eliminazions e la finâl. La manarie dal “televôt” (ancje se nol è un vêr televôt). Jenfri i jurâts, e je sentade, si impensaiso chê zovine che e cjantave a “Operazione Trionfo”, su Italia 1? Tâl Cindy Cattaruzza, dal Friûl ocidentâl. E po Alessio Turchetti, colorît baterist di une band di Udin (Exes), e l’imprenditôr musicâl, Alessandro Filippo. Te pontade finâl, ospit speciâl, tant che president de jurie, Christian Meyer, baterist di “Elio e le storie tese”. Ae fin ce si vinciâl? No bêçs, ma la incision di un album, la promozion e la difussion dal stes, il videoclip e la stampe di un servizi fotografic, par un valôr di cirche cinc mil euros.
PRODUZION DI CUALITÂT_ Ce che al va notât, sot l’aspiet produtîf, e je la preseade cualitât tecniche e di regjie dal program. La inovazion tes siglis e tal montaç, i stacs di cjamare nets, la pulizie de inmagjine. Alc di pardabon inovatîfs, insome, che dificilmentri no si viôt ator. Traviers di une ricercje incrosade su la rêt, o ai savût che dut chest aspiet nol è curât di Free, ma di une cjase di produzion esterne, “Fvg tube tv” che e prepare il prodot e lu fornìs ae emitent za sierât, “clâfs in man”. La stesse aziende e cure la part interative, vie Facebook e vie Youtube, dulà che si puedin cjatà i contribûts za regjistrâts, condividiju e comentâju.
JAN TOTI

Stin dongje ae Patrie

Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +