CULTURE – AGRICOLTURE. Jenfri lis busis dal formadi

Di sigûr in Friûl nô o vin un dai formadis plui bogns, che al jentre dentri te liste dai DOP europeans: il Montasio. Al è un formadi di alte cualitât, che al va fat lant daûr di un dissiplinâr rigorôs e controlât di un Consorzi. Tant par scomençâ, il Montasio al à di jessi produsût intun teritori definît (Friûl e in cualchi part dal Venit) tignint controlade la materie prime, ven a stâi il lat. Ancje chel al à di sei produsût par fuarce in Friûl (o in chei puescj permetûts dal dissiplinâr), par podê deventâ formadi Montasio. Chest gjenar di formadi al è produsût midiant di une formazion lente, cussì che al puedi vê particolaritâts rispiet a chei altris formadis.
TIPIC FURLAN_ Il Montasio al pues jessi fresc, semistagjionât o stagjonât. Chel che al cambie al è dome il timp che al sta fer a polsâ, e chest al da al formadi savôrs e aspiets diferents. Chel fresc al è un formadi plui mulisit e clâr di colôr, chel plui vecjo al è invezit plui scûr e friabil.
Al è un pôc di timp che si sta provant a fâ il formadi doprant il lat di une sole raze di vacje: o stin fevelant dal formadi fat dome di lat di Pezzata Rossa, la raze di vacje origjinarie dal Friûl. Al è stât ancje depositât inte Comunitât Europeane la marcje “Solo di Pezzata Rossa”, che e identifiche ducj chei prodots fats dome cul lat – o cu la cjar – de vacje “beletade” (o “flore”, ndr). Chest al è impuartantissim pal disvilup e pe conservazion di cheste raze, e al jude il disvilup di chest gjenar di arlevament.
CHEI ALTRIS FORMADIS_ No stin a dismenteâ nancje ducj chei formadis particolârs che o vin in Friûl e che a àn di jessi tutelâts e valorizâts: il formadi di Malghe, il formadi Asìn, il formadi frant e ducj chei altris prodots tipics che o podìn svantâsi di vê te nestre regjon.
In Friûl o vin une lungjissime tradizion tal cjamp di latariis e di casârs: no si pues dismenteâ di nomenâ latariis come chê di Breçà o di Mortean, Tresesin o Coder, Cividât, Glemone o Vençon. «La presince di tantis latariis – al comente Claudio Violino, assessôr regjonâl aes risorsis rurâls, agroalimentârs e forestâls – al testemonie la volontât di lâ indenant intune ativitât che par tancj e semee dismenteade. In dì di vuê, la int e sint la necessitât di comprâ i prodots vicins, chei fats dongje di cjase. Propit par chest, al è impuartant mantignî cheste tradizion che e caraterize la storie dal nestri Friûl».
Cinzia Collini