Sfuei Mensîl Furlan Indipendent
Archivi de Patrie

CUINTRISTORIE DAL TARAMOT. Cuinte pontade. Tal Cupulon, taiant pe braide

............

In vuê, la peraule ideologjie e je deventade un peraulate, ma in chê volte il confront des ideis al jere fûc che al scjaldave (ancje se ogni tant cualchidun si brusave). Tes tendopolis al è passât di dut, parcè che e je vere che al jere tant ce lavorâ, ma la sere, cence television ni nuie, la int si cjacarave, si resonave insiemi, si scoltavin ideis gnovis si cjatave il mût di incjarnâ chês vecjis.
Il Concili Vatican ii al veve cjatât te furlanie un biel grup di cristians in spiete: in spiete di podê fâ la messe in furlan, ma no dome: in spiete di une Vierte che e fasès passâ une glesie buine di “stâ cu la int”, de bande dai “ultins”. La storie di chescj cristians e je lungje: e nas tal autonomisim religjôs e culturâl e si slargje cjapant dentri cuistions sociâls, e cjatant pe strade compagns di viaç di estrazion politiche e filosofiche divierse, tant che Marchi e Pasolini. Te fin dai agns ’60 un document scrit di une clape di lôr e firmât de gran part dai predis furlans al devente un manifest centrâl te vite dal Friûl. E je la famose mozion dai 529 predis che cun clarece e fevele di un popul furlan colonizât e fat sotan, mostrant cemût che lis tematichis culturâls e linguistichis, e la idee de Universitât dal Friûl, a jentrin cu la cuistion dal lavôr (pôc e mâl paiât), cu lis servitûts militârs che a condizionin ogni svilup economic puartant ae emigrazion.
E po a son i studiâts, che pe prime volte a van a gjavâi ai predis il monopoli sul rûl di “inteletuâi organics” dai furlans. Lis primis gjenerazion che, cence jessi par fuarce fîs dai parons, a rivin a studiâ. A van tes grandis citâts dulà che tra prime e dopo dal ’68 si torne a fâ gnûf, tal ben e tal mâl, il mût stes di fâ politiche. Tant plui che di bot, dut al devente politiche, soredut il privât. E alore, cuant che si torne, nol baste lâ a votâ ogni tant: al bisugne “fâ”. E “fâ” stant cu la int. A Glemone, tai agns prin dal taramot, a metin sù la Scuele sociâl dulà che zovins a pene laureâts, in autogjestion, a judin lavoradôrs a cjapâ la licence medie, e cumò no stoi a indagâ se e jentre di plui la esperience didatiche di don Milani, il librut ros di Mao o alc altri di Marcuse: intant un grum di int, la sere, dopo vore, e à podût studiâ.
Chescj predis e chescj zovins a son alì, tes tendopolis, e tra la int si cjatin tant che “pes te aghe”. A àn colegaments che a saltin fûr dai borcs e a rivin in dute Italie, cui tes canonichis, cui tes facoltâts. A Glemone il grup dai studiâts che a tignivin sù la Scuele Sociâl al da vite al coordenament dai comitâts di tendopoli, al tache a scrivi il Boletin dal coordenament e po dopo i predis plui sgais a calin il caric dai lôr contats. In dute la aree taramotade si forme une rêt.
Si è creade un liende sui “estremiscj vignûts di fûr” a stiçâ la int: ma us parial che i taramotâts a sedin stâts ducj sturnei? La int des tendopolis no je stupide, no son pioris. Tancj a son stâts tal forest, a san trê o cuatri lenghis, a àn fate pratiche di sindicalisim te IG Metall in Gjermanie e di autogjestion tes latariis. E soredut a àn un lôr mût par viodi cui che al merete di fevelâ e cui une pidade tal cûl: i metin in man une pale e a viodin trop che i dure la batule.
La realtât e je che al Stât, tant ai sindics che ai militârs, ur è lât ben vê i comitâts cuant che no rivavin adore di capî di ce bande dal stivâl che al jere il Friûl, ma subit dopo, chê int e tacave a jessi fum tai voi. E la lôr stampe ur ten bandon. La int si sustave cuant che e sintive cjacarâ di fâ sù une Grande Udine o di scjampâ a Lignan cuant che al jere ancjemò Mai e si podevin fâ sù lis barachis pal Invier, o cuant che ogni joibe al ploveve e la sperance e lave a finîle tal pantan ator de tende.
Ai 23 di Mai, di domenie, il coordenament al clame tal “cupulon”, une gran tende tirade sù a glemone (te frazion di  ospedalet), une grande assemblee di taramotâts. Il sindic di Glemone sul imprin al da il permès, ma subit si capìs che e vignarà un slac di int e alore si movin la cuesture, i carabinîrs e la Digos. Di bot (dopo vincj dîs dal taramot) si scuvierç che la prioritât a son i siacai: al podê i covente un nemì par tignî buine la int. Si dinee il permès di doprâ il Cupulon e dapardut a vegnin metudis patuliis antisiacal di carabinîrs che a parin vie i taramotâts dai paîs dongje che a àn chê di lâ ae assemblee. Ma la int si sbat e e taie pe braide. Un miâr di lôr a rivin cussì al Cupulon, par cjatâsi denant la Digos che e pretint di viodi i documents, che plui di cualchidun al à lassât sot dai rudinaçs. Ma la prime Assemblee Gjenerâl si fâs compagn e la domenie dopo si ’nt fâs une altre, e cheste volte nissun al olse a dî di no. Invezit a tachin a partecipâ i sindics, i politics, i oms de comunitât montane, dai sindicâts e dai partîts, ognidun cuntune grande voie di meti il so cjapiel sore dal moviment des tendopolis. No le varan vinte. ❚
✒ Igor Londero – Autôr di «Pa sopravivence, no pa l’anarchie» Forme di autogestione nel Friuli terremotato: l’esperienza della tendopoli di Godo (Gemona del Friuli)

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +