Cuatri ents par rapresentâ la emigrazion furlane, plui o mancul atîfs

Alef, Efasce, Ente Friuli nel Mondo e Eraple: a son i cuatri ents che a rapresentin la  emigrazion furlane. La prime associazion, la Alef – sigle che e sta par “Associazione Lavoratori Emigrati del Friuli Venezia Giulia” – e fâs riferiment ae Cgil: ancje i sei uficis a son di cjanton cu la sede di Udin di chel sindicât. E je stade fondade tal 1968: vuê e conte 52 circui, une buine part di chescj a son concentrâts in Argjentine e li, tal 2005, e je nassude une associazion specifiche che ju coordene. Alef no si indrece dome ai emigrâts furlans e ai lôr dissendents, ma ancje ai imigrâts in Friûl. La ativitât di sostegn a pro dai prins e di integrazion a pro dai seconts e ven pandude midiant di une  riviste e doi sîts web.
“Efasce – Pordenonesi nel mondo” e sta par “Ente Friulano Assistenza Sociale  Culturale Emigranti”, istituzion volude de glesie di Concuardie-Pordenon. E, di fat, la associazion e je poiade a chê Diocesi, che dal 1907 e à volût jessi dongje e furnî assistence ai emigrants che a partivin di chê part dal Friûl. Vuê e opare midiant “segretariâts”, che a son sù par jù 120 e pal plui concentrâts in Argjentine. Di cualchi an, si à screât chel di Philadelphia, che al è cetant atîf e, pe sô struturazion, al è une sorte di zimul de cjase mari.
Ente Friuli nel Mondo al è nassût tal 1953: la sô sede si cjate a Udin, in vie dal sâl. E je la rêt plui grande di emigrants furlans e di lôr dissendents: 154 fogolârs furlans, cun 45 sedis di proprietât, par un totâl di 23 mil aderents (sù par jù). Al rapresente dutis trê lis provinciis furlanis e al da sostegn a cetantis ativitâts, de promozion de marilenghe, ae stampe di libris, ativitâts culturâls e di socializazion. La prossime assemblee dai socis e darà acet al Fogolâr numar 155: chel dal Michigan (Usa).
Misteri su la cuarte associazion. Eraple al sta par “Ente Regionale Acli per i Problemi dei Lavoratori Emigrati” e apont al varès la sede in vie Aquilee, al civic 22, li dal palaç de Acli. Il sît internet dut câs nol funzione plui, il numar di telefon al risulte “inesistent”. Nancje de stesse sede, là che o vin clamât, no san ce rispuindi, e a dirotin viers la segretarie regjonâl. No si sa se al à circui ator pal mont, ni il numar dai emigrâts che indi fasin riferiment.
Il panorame dai coregjonâi tal forest, in fin, si complete cun altris dôs associazions ricognossudis de Regjon tal 2012: Associazione Giuliani nel mondo (par Triest) e Sloveni nel mondo (pe minorance slovene).. ❚
✒ O.P.