Cuant vignaraie la “adunade” dai furlans?

Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se la so identitât e va a smamîsi, fin a sfantâsi tal nuie, o a cjatâ une altre suaze dulà scrofâsi, al mûr pardabon. Cence risurî.
◆ La spie di une int malade e je cuant che i mancje la fevele. Se un nol fevele plui, o al çavarie intune altre lenghe cuant che i si domande de so identitât, al vûl dî che al è daûr a tirâ il pît. E chest al somee jessi ce che al sta capitant ai furlans e ae lôr lenghe. Purpûr chest gjornal al à simpri conseât “Furlans, fevelait furlan, che al è onôr e no vergogne”: cussì e titulave “Patrie dal Friûl” tal Fevrâr dal 1948, un mês dopo la jentrade in vore de Costituzion taliane che al articul 6 e “tutele cun normis di pueste lis minorancis linguistichis”. Come che o savìn, a àn coventât 50 agns parcé che cheste prevision e deventàs leç (la 482/99) par ricognossi ae marilenghe plene dignitât tai uficis publics, su lis stradis, te comunicazion, inte scuele. Il probleme al è che lis leçs a van jempladis di contignûts e di finanziaments, ma a cjaminin soredut parsore des gjambis dai oms. E a 75 agns de Costituzion si pues dî che ni il Stât talian ni i furlans a àn fat a dimplen il lôr dovê.
◆ Se Rome e je rivade tardone, cuintri voie e cun cuatri carantans, si scuen dî che i furlans no àn fat masse par difindi la lôr lenghe, che si pant simpri di mancul e in maniere che e clope sot dai colps dal talian e dal inglês. In ce maniere alore si puedino salvâ une lenghe, une identitât e un popul?
◆ Dostoevskij al diseve che “dome la bielece e salvarà il mont”. E salacor dome la creativitât e po judanus a resisti. Par esempli, al è timp fin ai 30 di Jugn par partecipâ al Premi San Simon, rivât ae edizion numar 44: scrivi par furlan (ma ancje cjantâ, recitâ, zirâ films) al po dâ ae marilenghe il ricognossiment che e merite. E la identitât e po cressi ancje traviers dal sport: cun esperiencis gnovis e bielis come chê de Associazion Sportive Furlane. Su iniziative di Daniele Puntel, prin a sburtâ la nassite de “nazionâl furlane di balon”, la ASF e à rivât intant a meti dongje une rapresentative di Bale tal Gei che sabide ai 24 di Jugn a Tresesin e sfidarà la scuadre dal Jadran.
◆ Ancje cussì si fâs cuintri al declin. Ancje cussì si scuvierç lis fondis di une storie che in passe mîl agns e je stade buine di meti in pîts une culture, une lenghe, un mût di pensâ che a son ugnui in Europe. E forsit une dì, invezit di gjoldi a tirâ fûr il Tricolôr a ogni adunade di alpins o a ogni tape dal Zîr de Italie, i furlans magari si rindaran cont che a varessin di jessi lôr a tirâsi dongje, fâ comunitât midiant de identitât. La “vere” adunade, la lôr, e à ancjemò di vignî, simpri che o timp o tart a decidin di tirâ fûr lis ongulis cuintri cui che al à voie di scancelâju de linie dal timp. ❚