Sfuei Mensîl Furlan Indipendent
Archivi de Patrie

Cuant che la Messe dal Spadon si diseve in plui bandis de Patrie

............

Significât e storie des celebrazions liturgjichis cul spadon in Friûl. Une messe che e fâs siet secui e che si diseve ancje in plui puescj rispiet a cumò

Il spadon al è adalt. Lu ten a dôs mans il diacun. Denant di lui il zagut vongolant il turibul al sborfe une fumate penze e odorose di incens che e ven taiade de lame. Il diacun al salude cu la spade la int che e jemple fûr di misure il domo di Cividât. Al veve cjantât il vanzeli de Pifanie te antighe tonalitât patriarchine, simpri cul spadon adalt e l’elm cu lis plumis rossis e blancjis, i colôrs di Cividât, e zalis e turchinis, i colôrs de Patrie dal Friûl. Prime al veve saludât i cjalunis, il clericât e i sorestants cul spadon intune man e un vanzeli preziôs e antigon ta chê altre.

Une manifestazion in costum par tirâ dongje turiscj? No! Al bastarès dîsi che a son scuasit siet secui che si fâs la Messe dal Spadon par dâi il rispiet che e merete. Ma la antichitât no jude a capî il significât di chei segns. Parcè si fasie alore cheste messe “dal spadon”? Di teoriis a ‘nd è almancul trê.

La prime. Tal 1366 al cjapà possès de Patrie il patriarcje Marquart di Randek, todesc de Svevie, dotôr di leç a Bologne e in confidence cul imperadôr Carli IV. Al è considerât tant che l’ultin patriarcje di sest che al guviernà il Friûl: al fasè sbassâ il cjâf a Vignesie, al tornà a cjapâ Triest e la Istrie e al fasè stampâ lis “Costituzions de Patrie dal Friûl” in vore fintremai a Napoleon. Dopo de prime e sflandorose messe te Basiliche di Aquilee e dopo de sentade dal Parlament de Patrie a Udin, il gnûf patriarcje al fasè il so ingrès a Cividât. Sentât te catedre dai duchis dal Friûl, al ricevè in don dal Vicedean la spade, simbul de sô signorie temporâl, che al metè vie inte sfodre blancje. E il spadon che si dopre ancjemò in dì di vuê a Cividât te messe de Pifanie al puarte incidût il non di Marquart e la date dai 6 di Lui dal 1366. Ma, ancje se i cividins i tegnin une vore, chel spadon, daûr la fate, al è di un secul dopo e la cerimonie di chê volte e je dal dut diferente di chê che si fâs cumò.

La seconde. Il patriarcje Bertand di S. Geniès, pai furlans Beltram, al doprà cussì ben il pastorâl di vescul che al fo fat beât. Ma al doprà ancjetant ben la spade par difindi la Patrie sei dai nemîs di fûr sei di chei di cjase in Friûl. E lu fasè cussì ben che no jal perdonarin: al fo sassinât ai 6 di Jugn dal 1350 tai prâts de Richinvelde. Un dai siorats plui cjaviestris al jere il cont di Gurize. E al è propit par dâi une regolade al cont che Beltram al scuen meti sot assedi la citât. Al rive sot lis muris di Gurize la vilie di Nadâl dal 1340. Lis monts a son blancjis di nêf. Al ven scûr: e je la gnot di Nadâl, une vore frede.

Ducj i soldâts a pensin ae famee, al çoc nadalin sul fogolâr. “Non è pussibil passâ cussì la gnot sante de nassite dal Signôr!” al sbroche il patriarcje. E al ordene di tirâ sù un altâr tal mieç des tendis. Ae lûs rossite des torcis dut l’esercit de Patrie al è inschiriât, cui conts di Ortemburg in prime file, ducj cu lis armaduris lustris intor, pronts tal câs di une surtide dai gurizans. Ancje Beltram, e cun lui Gjilbert, abât di Mueç, al met sù i paraments pe messe parsore de armadure di fier. Tal frêt, sot lis stelis, il Patriarcje, vescul e vuerîr, cjavei di arint e stature imponente a dispiet dai siei 80 agns, al celebre une messe cussì comovente che i stes gurizans, inmagâts de sene, le amirin dal alt de lôr toratis. Tancj a àn motivade la messe dal spadon cun chest avigniment gurizan. Invezit, ancje se une vore biel, la origjin e à di jessi cirude inaltrò.

La tierce. Nus ven in jutori Gerard Schwedler de Universitât di Heidelberg, studiôs forest di robis furlanis, là che i nostrans nol somee che a vedin cirût masse. Il todesc al dimostre che la olme juste e je chê des messis di Nadâl cu la spade che si fasin in Gjermanie, clamadis Schwertmesse. E che il prin al fo l’imperadôr Carli IV che, te messe dal 1347 a Basilee, al “leiè a vôs fuarte il vanzeli cu la spade disfodrade in man”.

Si sa ancje che a sugjerî al imperadôr la gnove al fo nuie di mancul che il so conseîr Marquart di Randek, par dimostrâ, cun chê “liturgjie politiche”, la potence dal imperi tal moment plui sacri dal an. E alore e torne juste la origjin de nestre “messe dal spadon” peade ae figure di Marquart. Deventât patriarcje, al impuarte in Friûl chê cerimonie par marcâ il “so” podê spirituâl e, tal stes timp, temporâl. Di chê volte si fasè messe cu la spade ogni gnot di Nadâl a Aquilee (fin al 1751 ma cumò tornade a cjapâ), a Gurize fin al 1905 e a Udin fin al 1848.

Ta chel an, daûr dai ordins dal maressial Radetsky, i cjalunis di Udin, cu la sbigule di jessi fusilâts, a consegnarin daurman il spadon al Comant de Provincie dal Friûl.

La “Messe dal spadon” e je duncje une tradizion viere di secui che e memoree il dopli podê spirituâl e politic dal Patriarcje di Aquilee sul stamp dal Sacri Roman Imperi todesc. E nus permet, ancje vuê, di partecipâ a une des liturgjiis plui singolârs e sugjestivis che la Glesie e vedi mantignût, che nus ricuarde la storie gloriose dal Friûl e nus vierç al messaç di pâs dal Nadâl. ❚

Diego Navarria

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +