Al è mancjât a 86 agns Raffaele Carrozzo, figure di riferiment dal mont furlanist e autonomist, ex aministradôr comunâl a Udin (dulà che al jere a stâ), za docent e preside, persone di grant nivel uman e culturâl. In citât si jere trasferît di zovin, di Cjasarse, in curt si jere inamorât de lenghe e de culture furlanis, che al è stât apuestul no dome pai studis, ma ancje inte azion politiche concrete. Laureât in filosofie ae Universitât di Triest, al jere stât preseât docent di talian e storie al “Stringher”. Po dopo al à diret di preside diviersis scuelis mediis ator pal Friûl. Al è stât tra i fondadôrs dal Moviment Friûl e insiemi cun Gianfranco Ellero al à scrit “L’Università Friulana”, dulà che si contestave che l’unic ateneu in regjon al fos chel di Triest. Al fi Sandri, nestri colaboradôr, a van lis condoleancis de redazion da La Patrie dal Friûl.
__
Condoleancis ancje a un altri colaboradôr dal nestri mensîl, Marco Stolfo. Il pari, Silvio, al è mancjât a Turin. Nassût tal 1934 a Cjarlins (li che a son stadis puartadis lis sôs cinisis), al à passât la plui part de sô esistence inte aree metropolitane turinese li che al à lavorât tant che muredôr e po tant che operari ae Fiat. L’amôr pe vite, pe nature e pal lavôr, intindût ancje tant che espression personâl e cjamp di condivision e di emancipazion coletive, e po, il caratar pacific, sensibil e gjenerôs, il lunc impegn intal volontariât e intal associazionisim, in ambit sociâl, culturâl e ambientâl, e il leam fuart cu la sô tiere di origjine, il Friûl, a piturin la figure di Silvio Stolfo, che al lasse la cussience de impuartance di jessi e di vivi in comunitât, daûr di chei principis di solidarietât e umanitât che a son stâts la sô bussule. ❚
par cure de redazion
