COGNONS DAL FRIÛL

Midiant de storie dai cognons furlans, si fâs ancje la storie dal nestri Friûl. Chest mês us proponìn 4 cognons che nus son stâts domandâts dai letôrs su la pagjine Facebook de La Patrie dal Friûl (gjavâts fûr di I cognomi del Friuli  di Enos Costantini e Giovanni Fantini ed. La Bassa/LithoStampa. O ringraciìn i autôrs pe disponibilitât e pe colaborazion).
——–
BERTOLIN/BERTOLINI
Si pense che al puedi vignî dal non Bertul o Bertol, diminutîf di Bert, forme scurtade dai nons Alberto, Roberto e vie indevant. Ma par cualchidun il non furlan Bertul al corispuint al talian Bartolo. Bertolin al è une vore presint tal Venit e, in Friûl, soredut a Cjasarse, S. Vît dal Tiliment e Pordenon. Bertolini si cjatilu a Pozzecco, tal comun di Bertiûl. Al ven di pensâ, duncje, che al puedi jessi Bert(i)ulin, tal sens di origjinari di Bertiûl. In cheste forme ancje a Udin, Puart, Codroip e Gurize. 1400, 6 febbraio Orsola ved. et erede q. Pietro q. Bertolino da Firenze già abit. a Udine. Petro abitò a lungo a Udine e mercanteggiava in diverse cose, specialmente sale ed olio, anche maiali.
NARDIN
Forme scurtade di (Ber)nardin o (Leo)nardin. Tal 1264 Nardinus a Glemone, tal 1482 Antonio Nardini a Spilimberc. Si cjatilu a Cormons, S. Vît de Tor e Gurize. Ma ancje a Çopule, Çarvignan, Gardiscje, Romans e Pasian di Pordenon. 1493, 13 ott. Nicolò Furlani q. Giac. da Basagliapenta in lite con Dom. Nardini di Basagliapenta. 1554, 7 aprile
TONDON/TONDO
Al pues jessi il sorenon, deventât cognon, di une persone gruesse (taront/toront). Tal 1338 Nicolao dicto Tarondo de Selva. Par altris al ven di tont (pôc svelt). Ma no si pues lassâ fûr la pussibilitât che al sedi un non di origjin gjermaniche tant che Dondo. Te forme Tondon, al è un cognon di Gonârs e di S. Zuan. Tondo si cjatilu a Buie, Monfalcon, Udin e Cjamin di Codroip. 1759 Gio.Batta di Dom.co q. Gio.Batta q. Dom.co q. Leonardo Tond di Buia sposa Sabbata di Dom.co Tond pure di Buia.
ZUCCOLO
Di çucul, ma forsit ancje di zugule, piçul uciel peât cuntun spali a une vuiscje e che, svoletant, al covente di riclam par altris uciei. Duncje un sorenon. 1477, 19 maggio Nicolò Zuccolo cancelliere del Luogoten. Giac. Morosini; 1624 Vincenzo Zucollo fittuale nobb. Savorgnan in Horzano. Cognon di Udin, Vidulis, Buri, Cividât. Si cjatilu ancje a Pavie, Basilian, Pagnà, Pasian di Prât.
par cure di Michela De Fazio