CJARGNE VIVE. La aziende agricule de famee

Piero Travani Tomat al è un zovin di vincj agns inamorât de sô tiere e dal so lavôr. Dopo vê finidis lis scuelis superiôrs (al è perît edîl), al à sielzût di continuâ la ativitât di so pari inte aziende agricule, savint benon lis dificoltâts che al varès cjatât ma fiduciôs intun doman plen di sodisfazions.
La aziende di famee si cjate intal comun di Enemonç e si poie principalmentri sul arlevament di vacjis di lat. Tai ultins agns a àn zontade une gnove ativitât, la produzion di cartufulis: intune superficie di doi etars, a coltivin diviersis cualitâts di cartufulis che a vegnin metudis sul marcjât.
“Une des dificoltâts principâls tal nestri setôr, e no dome – al conte Piero -, a son i coscj alts di produzion, che inte nestre zone di mont a incindin cetant sul vuadagn finâl. In chest lavôr no son ni fiestis ni dîs di vore, ogni dì al tocje jessi presints.
Forsit la plui part des dificoltâts te nestre categorie a son par vie che e je une negligjence inte gjestion politiche dal teritori. O noti une incapacitât di valorizâ e tutelâ lis ativitâts agriculis che, in Cjargne, a podaressin dâ buinis oportunitâts par tancj zovins e un leam cul setôr turistic.
Il bandon de agriculture al à puartât il bosc a vignî indenant dibot fin su pe puarte di cjase e lis bestiis salvadis a svicinâsi, ruvinant lis culturis.
I aspiets biei dal gno lavôr a son la autonomie di gjestion, il vivi a contat cu la nature e cui animâi che o tiri sù. Mi da grande sodisfazion, par esempli, fâ nassi e tirâ sù lis vidielis che a deventaran vacjis di lat pe mê aziende.”
Piero, ancje se lis dificoltâts a son tantis, si stime fortunât di podê lavorâ te sô tiere, ancje parcè che al viôt tancj siei amîs che a scuegnin cirî lavôr tal forest.
“O crôt che par un zovin che al vueli vierzi une ativitât come la mê al sedi cetant dificil – o cuasi impussibil – rivâ insom, soredut se nol à aes spalis almancul une piçule aziende agricule. E chest, sedi pai tancj coscj che pe burocrazie che e scjafoie ogni iniziative.”
✒ Marta Vezzi