CJARGNE. Comun di Tumieç: inmò une volte cuintri lis slot machines

Al è di un pôc di timp che la Aministrazion Comunâl di Tumieç e sta puartant indenant diviersis iniziativis su la cuestion des salis di zûc: cualis sono stadis lis plui impuartantis in chescj ultins timps?
La iniziative plui impuartante e je la stesure di un regolament pal zûc di azart che al vignarà esaminât de Comission regolaments e puartât ae aprovazion in Consei comunâl chest atom. Si sin ispirâts a diviers regolaments di tancj comuns talians che a àn vût cûr di “sfidâ il sisteme” e di imponi limits resonevui al slargjâsi “lecit” dal fenomen. Chestis aministrazions si son dimostradis coragjosis e a àn aplicade une politiche “ative”, invezit che un ategjament passîf dal “no si pues fâ”. L’azart al puarte un grum di bêçs al Stât che lu permet e lu incentive; noaltris tal regolament o vin cirût di arzinâ il fenomen, no dome in mert aes distancis des salis di zûc des “zonis sensibilis” (glesiis, oratoris, ospedâi, e v.i.), ma imponint ai gjestôrs cors periodics di formazion sui pericui sociâi e sanitaris leâts al zûc compulsîf, e vietant la publicitât al azart in ogni sô forme, su dut il teritori comunâl: cheste e je la vere part inovative.
Parcè il probleme isal rivât in consei comunâl e ce isal stât decidût intal ultin consei dai 31 di Lui?
Il stampon dal regolament al è stât puartât in consei comunâl ai 31 di Lui di bande mê e dal conseîr Saro par sfuarçâ i timps e par permeti un dibatit ampli, viodude la emergjence de problematiche e la iniziative indecorose di une sale di zûc di Tumieç di organizâ un dopomisdì di zûcs pai fruts. La discussion e je stade buine e si à decidût di lâ indevant in spiete e, si spere, in sintonie cu la leç regjonâl sul azart, che e varès di jessi aprovade in Setembar. Si à decidût di lâ indevant distès, ancje tal câs che la Regjon no fasi in timp a legjiferâ prime dal “so semestri blanc” e la propueste e je stade deliberade ae unanimitât.
Ce conseguencis àno puartât lis sieltis dal Comun di tutelâ la salût e il probleme des dipendencis dai citadins invezit che tutelâ i interès dai gjestôrs dal business dal zûc?
Si dîs che “pecunia non olet”, ma l’aministradôr judiziôs al scuen ricognossi i pericui che a corin i citadins, soredut lis fassis plui debulis. Cuant che dopo si cîr di tirâ i fruts in iniziativis organizadis des salis di zûc, la Convenzion ONU pai dirits de Infanzie e à la prioritât su cualsisedi considerazion economiche. Il probleme nol è dome di Tumieç, duncje le tematiche dal azart e je inseride, mi risulte uniche in Regjon, tai Plans di Zone dai Servizis Sociâi dai Comuns, par podê fâ informazion, prevenzion e cure in dut il nestri comprensori montan. ■
Marta Vezzi