Il titolâr de aziende agricule di Val, piçule frazion di Darte, al è Riccardo Pavan Mazzolini. Al à 22 agns e al sta studiant inzegnarie te Universitât dal Friûl. Te aziende Orcolat Sbilfat i dan une grande man i siei gjenitôrs Luisa e Carlo. «O vin plui di 100 animâi – e conte Luisa – 70 cjavris, 15 vacjis, 20 mus, dôs cjavalis e tancj piçui animâi tant che gjalinis, ocjis, cuaiis e v.i. La passion pai animâi nus e àn passade gno pari e mê mari e la grande passion pal teritori nus à fat tornâ in Cjargne. Jo o soi di une frazion di Udin, o ai fat il miedi par Emergency e o ai zirât il mont, lavorant simpri par chei altris. Insiemi a Carlo e Riccardo o vin decidût di fâ alc par chestis comunitâts e o vin metût impins cheste ativitât avonde inovative che a fâs prodots biologjics.»
Chê altre ativitât «Dopo o vin la ativitât estive in Val Medan Alte (che e cjape dentri trê malghis) dulà che o fasìn un agriturisim biologjic cun vendite direte di formadi, scuete, spongje. Un prodot une vore particolâr al è il formadi fat cul lat di vacje, mus e cjavre insiemi. Nô no doprin il cali di bestie ma il cali di gjenar vegjetâl. Dongje dal formadi, o fasìn il frico precuet biologjic (fat cu lis nestris cartufulis e cul nestri formadi) e la polente biologjiche (la farine le cjolìn di un produtôr biologjic) e ancje altris plats cjargnei (cjarsons, tocj di braide, tocj di vore…). I nestris prodots a vegnin ancje vendûts tai marcjâts (di solit, a Tarcint e a Udin o sin dutis lis setemanis). La ativitât nus impegne tant. Chest an il gnûf prodot al sarà la bire agricule. Nô o vin la coltivazion dal urtiçon. O fasin part di un circul di aziendis furlanis indulà che nô o puartin la materie prime e che a deventarà Bire Marie Svualde di Cjargne. Di Jugn e varès di jessi pronte e e vignarà dade fûr tal agriturisim.» In plui, par cui che al vûl passâ un pôcs di dîs intal mieç de pâs, al è puest par durmî e se, nol baste, si pues rilassâsi fasint i bagns tal fen.
I volontaris Carlo, Luisa e Riccardo a àn une persone che ur da une man e, pal fat che di doi agns a son iscrits ae associazion Woofer, dut l’Istât a àn volontaris che di dut il mont ur van a dâ une man. Cun di plui, a stan lavorant sul progjet Ecomuseo: un progjet par svilupâ e par fâ cognossi i puescj biei de Alte Bût «O cirìn di fâ rivivi il teritori cu lis nestris iniziativis. O sin intun puest dificil di rivâ e cun tantis dificoltâts: lis stradis a son stretis e ancje dome il movi il fen di un puest a di chel altri al devente un probleme… Ma o tignìn dûr, ancje se jutoris no si ‘nd viodin… Ma la passion e l’amôr par cheste tiere nus judin a lâ indevant.» ❚
✒ Marta Vezzi
