Sfuei Mensîl Furlan Indipendent
Archivi de Patrie

Di chest an, lezions di furlan te Universitàt di Buenos Aires: une storie che e ven di lontan

............

Il furlan al va ator pal mont, si sa, nol covente dîlu; la ultime gnove e je che si fasaran lezions di furlan in… Argjentine. No je une robe che e à di lassânus scaturîts plui di tant: al è un precedent sucedût di dute une altre bande.

O vin di tornâ indaûr di cualchi an, tal 1991, cuant che a son nassûts i cors di furlan a Praghe. Cheste biele storie nus e conte Giorgio Cadorini, insegnant di lenghe furlane, il prin che al à tignût un cors regolâr universitari di furlan tal forest: «Sdrumât il mûr di Berlin, o soi lât a viodi Praghe. Intal Zenâr dal 1991 o soi lât a insegnâ talian intune scuele di lenghis di li. O jeri daûr a scrivi la mê tesi di glotologjie sul furlan cul professôr Mario Doria e cussì o levi dispès inte biblioteche dal istitût di romanistiche de Facoltât di Filosofie. Une volte, doi professôrs mi àn fermât par domandâmi ce studis che o fasevi. Cuant che a àn savût che mi interessavi di furlan e che lu fevelavi, mi àn domandât di fâ une conference pai professôrs dal istitût e dopo se o volevi tignî un cors. E cussì, inte Sierade dal 1991 o ai tacât ». I cors di furlan a Praghe a son lâts dal 1991 al 2004, ogni an 3 cors di doi semestris: lenghe, storie e civilizazion, leture di tescj. La lenghe di insegnament al jere il furlan (cualchi volte ancje il cec), par chel i students a scugnivin jessi une vore svelts a cjapâ sù lis fondis de lenghe. Daspò di Praghe, Cadorini al à fat ancje cors universitaris intensîfs a Cjaudistrie intal 2009 e doi a Gnove Gurize intal 2010 e 2011, paiât des universitâts forestis. Nol è cussì strani alore pensâ che il furlan al sedi rivât fin in Argjentine…

O rivìn duncje al 2017, l’an li che la Societât Furlane Buenos Aires, ‘la None’ dai Fogolârs furlans ator pal mont, e fâs il so 90sim inovâl. E à un laboratori di lenghe furlane cun aromai 11 agns di ativitât aes spalis, tignût dal mestri Galliano de Agostini (che al jere stât part di chel cuartet vocâl ‘Armonie’ direzût dal compositôr Rodolfo Kubik te decade dai agns 70). Pe prime volte, cul jutori de Regjion F-VJ, la Societât Filologjiche Furlane si è metude in contat cu la Universitât di Buenos Aires par fâ un cors programatic di furlan. Nus al conte il president dal sodalizi Eduardo Dino Baschera: «Il cors al è intensîf e al dure 45 oris. Puartât indenant dal professôr Flavio Vidoni, si viodin lis fondis de lenghe, la grafie, e si scomence a aprofondî il vocabolari fin par rivâ a lei parts gjavadis de leterature furlane. Une robe biele e je che si sin cjatâts devant ancje int che e voleve svicinâsi al furlan cence jessi dissendente di furlans, tant che une femine di origjin gjaponese par vie che e à un amì furlan. Une altre smire – al dîs Eduardo – e jere chê di ‘sveâ’ cualchi ‘furlan platât’ che nol partecipàs aes associazions, e chest al vâl par esempli par doi dai arlêfs».

Ma cemût vadie la esperience a Buenos Aires? Par savê alc o vin sintût ancje il professôr dal cors, Flavio Vidoni: «Al è stât il president de Societât Filologjiche, Federico Vicario, a proponimi cheste esperience che o ai acetât a bot e sclop. Il gno nominatîf al è stât fat bon dal Ente Friuli nel Mondo parcè che o vevi fat doi cors tal 2014 e tal 2015 a Colonia Caroya. Chest cors di Buenos Aires, però, al à une carateristiche in plui: dopo agns che la Sociedad Furlane di Buenos Aires, cul so president Baschera, e domandave di zontâ ancje il Furlan tra i cors serâi par adults, la universitàt e à metût a disposizion une aule intun dai siei edificis. La diference cui cors ‘intensîfs’ di Colonia Caroya e je che culì a àn oraris universitaris: dôs lezions par setemane di dôs oris parom. Chest al vûl dî che par davuelzi lis 45 oris che il cors al previôt, o ai di stâ chi trê mês. I arlêfs a son dodis, ducj adults, cualchidun bielzà ben madûr, ma ducj une vore interessâts e atents. Ce ur insegnio? Chi dome in doi o trê câs si partìs di int che e fevele bielzà il furlan. O ai però scomençât il cors disint che par imparâ a nadâ bisugne butâsi te aghe: subit leture e daûr conversazion, lessic e gramatiche. Insome, sino o no sino intune Universitât? Ducj contents. A fasin vulintîr ancje i compits par cjase». ❚

✒ Sara Palluello

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +