Sfuei Mensîl Furlan Indipendent
Archivi de Patrie

CJARGNE. Associazion Gjenitôrs Val Tiliment

............

Al è di un pôcs di agns che a Soclêf e je ative la Associazion Gjenitôrs Val Tiliment che e sta puartant indevant tantis iniziativis.

«La idee e nas di un grup di maris che a vevin vût a ce fâ cu la puericultore Mara Nassivera» e dîs la Presidente Anna Zilli. «Mara e stave daûr ai nestris fruts e nus diseve simpri di no sierâsi in cjase ma di cjatâsi: une maniere ancje par confrontâsi sui problemis dai fruts, par no isolâsi e cjatâsi di bessolis jenfri i mûrs di cjase. Cussì o vin cirût un puest indulà viodisi. Di pôc, il grup anzians al veve vût dal Comun di Soclêf in comodât il vecjo asîl che dopo il taramot al jere deventât par cualchi an la scuele elementâr. Cussì o vin rivât adore a vê une part par nô.»

La struture e à un biel zardin sierât e une grande sale di cirche 50 metris cuadris, e in comun cul grup anzians e je ancje une cusine. «Achì o vin tacât a cjatâsi» e dîs Anna. «Tal principi nol jere nuie, e plan planin o vin puartât dongje robe. Tor la fin dal 2011 e l’inizi dal 2012, Mara Nassivera si è malade. Nô maris i vevin prometût che o varessin fate une associazion, e duncje o vin acelerât i timps par fâi viodi a Mara che ce che e veve semenât al veve puartât a alc di concret. Inviade la associazion, o vin pensât di fâ un progjet su ativitâts pai fruts 0-3 agns: tal 2012 o vin vint il bant e lu vin concretizât. Dopo, o vin fat 3 progjets su bants in merit ae associazion familiâr e 4 progjets su associazion di proporzion sociâl. Duncje, ogni an nô o gjestìn 2 progjets.»

A son un grum lis ativitâts che a vegnin puartadis indevant: centris estîfs par fruts, cors di nadâ, gjinastiche artistiche, bale tal zei, karate, musiche: ogni an, al è un program diferent.

In chest periodi, la setemane e je programade cussì: lunis dopomisdì un educadôr de aziende sanitarie si dediche ai fruts di 0 a 3 agns, il martars al è il cors di psicomotricitât, il miercus cors di nadâ pai associâts, la joibe al ven viert il parc dai zûcs pai fruts che a vuelin cjatâsi e zuiâ.

La associazion (che e cjape dentri un pôc ducj, di 0 a 99 agns: fruts, gjenitôrs, barbis, nonos) e à sede a Soclêf ma e cjape dentri ancje i comuns dongje: i cors a vegnin fats ator pai paîs, tes struturis che a esistin za e che no vegnin dopradis trop.

«Chest an o vin inviât, pal cuint an, il cors di inglês pai grancj. O vin in program ancje un cors gratuit par tignî in maniere regolâr prodots fat in cjase (al vâl tant pe part alimentâr che pe part contabile) viert a ducj. La novitât di chest an e je che o sin rivâts a jentrâ intes scuelis e a puartâ un educadôr che al insegne ai fruts a fâ il cjamp.»

Par partecipâ aes iniziativis al baste deventâ socis. Cui che al vûl altris informazions al pues mandâ une mail ae direzion genitorivaltagliamento@gmail.com.

Pagjine facebook: associazione val Tagliamento – AGVT.

✒ Marta Vezzi

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +