Dai studis de dotore Di Fazio si à fevelât ai 25 di Mai a Cividât, indulà che la oncolighe e je stade invidade a presentâ la sô ultime publicazion, intun incuintri cun intervents ancje de dotore Maria Parpinel, dal Istitût di Igjiene e Epidemiologjie de Universitât dal Friûl, dal gjornalist Guido Mattioni e dal agronom Enos Costantini. Al espert di agriculture (e culture) furlane, i vin domandade une valutazion su lis conclusions de specialiste e sul stât di salût dai prodots nostrans.
__
L’incuintri al à vude une partecipazion une vore sintude (si à scugnût mandâ vie int, che la sale e jere folcjade). Chest al dimostre un aument di atenzion e sensibilitât a chescj temis.
«E sarès ben la ore. Chescj events a somein ocasions straordenaris, cuant che invezit il dialic jenfri miedis e agronoms al varès di jessi dal dut normâl».
__
Miedis che però a àn metût il bulin neri sore di prodots che a fasin part di simpri de nestre tradizion, tant che il formadi o la robe insacade.
«Il pont al è che no si pues plui fevelâ di tradizion: la agriculture nostrane e je stade savoltade de logjiche de monoculture de blave, cul efiet di sdrumâ vie dut ce che al jere prime. Fasêt calcul che 100 agns indaûr in Friûl a jerin 50 mil etars di cjamps coltâts a fasûl; cumò, invezit, al è za tant se si rive ai 50. Il vêr drame al è che no si prodûs plui par cui che al mangje, l’om, ma pes bestiis (blave e soie) e par fâ biogàs, cu la assurditât di un rindiment energjetic negatîf. Cun di plui, l’aliment al è dal dut cambiât, nol à plui il gust, ma soredut lis proprietâts di un timp. Dal rest, la verdure o lis pomis a àn plen valôr cuant che a son a pene cjapadis sù: ce sostance puedino dâ prodots che a àn fat chilometris e chilometris zirant dut il mont prin di rivâ sul marcjât?».
__
E i aliments di divignince animâl, invezit?
«Di mâl in piês. Cjapìn l’esempli dal formadi, che al jere un prodot de filiere curte. Cumò la raze bovine no je plui chê, no si dâi plui il fen dal prât, ma ben semencis di coton e soie de Argjentine e la lavorazion e je di tip industriâl. Al è clâr che nol è di ce fidâsi di une forme di formadi – ancje chel marcât Montasio – che ti scrivin che la crodie no si à di mangjâle, stant che e je stade tratade cui antibiotics. La stesse robe e vâl pe cjar. Une volte il purcit si lu tirave sù in cjase e une bestie e veve di bastâ par dut l’an par une famee interie, cumò invezit si va al minim un o doi viaçs par setemane al centri comerciâl, nancje plui in buteghe, e si compre cjar che e je dome che velen».
__
Duncje o vin di rassegnâsi a gjavâju des nestris taulis?
«No soi un miedi e no pues dâ une diagnosi, dut câs, il discors al è simpri chel de moderazion e de atenzion: svicinâsi al prodot biologjic, mangjâ lat e derivâts dome ogni tant, cirint di consumâ il prodot rût o lavorât cun moderazion. Vuardaitsi des scritis “salutistis”, come mancul gras, “light” o a bas indiç glicemic».
__
Cuale podaressie jessi la soluzion par une agriculture plui juste?”
«In Friûl lis politichis agriculis lis àn simpri fatis chei altris, cence mai scoltâ chei che a coltin. Bisugnarès vê une classe dirigjente cuntun progjet par che la agriculture furlane e dedi di mangjâ ai furlans e e torni a jessi locâl, ecologjiche e etiche (peraule aromai discomparide dal vocabolari, e no dome tal cjamp agricul). Tal stes timp, il consumadôr al à di metisi tal cjâf che comprâ prodots dal puest al è pal so ben, in plui che par chel de sô tiere. Dome cussì o podarìn pardabon dî che la salût e ven mangjant». ❚
di Serena Fogolini
