La nestre regjon di cualchi an e sta scuvierzint une maniere gnove e tal stes timp antighe di vivi il teritori in viaç. Si trate dal “lâ a pît” e di fat, ancje sul sburt dal “an talian dai pelegrinaçs” volût tal 2016 dal ministeri de culture, a metât di Març la Comunitât Culinâr e à organizade la seconde edizion dai Stâts Gjenerâi dai Cjamins, trê dîs di incuintris e apontaments par presentâ la FVGWalKart, un progjet Interreg Italie-Austrie dedicât a chest teme.
Ma ancje Glesie Furlane, dopo dai doi libris di pre Antoni Beline (Impressions di un levit furlan pelegrin in Tiere Sante, dal 1995, e A Sant Jacum là che al finìs il mont, scrit tal 1996, ducj doi publicâts de Grame tal 2004), e je tornade sul teme dai pelegrinaçs cul libri Sul Troi di Aquilee publicât tal 2015 e presentât in passe 15 seradis ator pal Friûl tra il 2016 e lis primis setemanis dal 2017. No dome: dopo dal taramot di Avost e Otubar che al à sdrumât diviersis localitâts de Italie centrâl, a Nadâl dal 2016 a son stâts consegnâts ae Associazion Amici del Cammino di San Benedetto i mil euros cjapâts sù cu la prime campagne di solidarietât par judâ la rinassite dal Ostel Capisterium di Norcia (PG).
Daûr di cheste esperience, tra sabide ai 8 e domenie ai 9 di Avrîl, e je stade organizade ancje une altre iniziative benefiche che e proviôt la presentazion de Vuide dal Cammino di San Benedetto la prime sere a Basandiele li dal Oratori parochiâl cul intervent dal autôr Simone Frignani. Te buinore dopo, cun apontament aes 6.45 sot dal tor di Popon a Aquilee e partirà la cjaminade solidâl vierte a ducj che e puartarà i ospits suntune “cerce” dal Troi di Aquilee (www.camminoceleste.eu) fin li de gleseute di Sant Marc, par une sorte di leam di amicizie e solidarietât tra il Cammino Celeste e il Cammino di San Benedetto. La iniziative benefiche, che e à il patrocini de Provincie di Udin e dal Comun di Aquilee, e vûl jessi une ocasion di solidarietât pal Ostel Capisterium, ma e à ancje chê di fâ cognossi il Friûl a esperts di pelegrinaçs come Simone Frignani e altris che lu compagnarà di fûr regjon. Par informazions e detais o podês scrivi a info@glesiefurlane.org e par donazions: ASSOCIAZION GLESIE FURLANE, IBAN: IT35Y0863763790000023015162, Causâl: Ostel Capisterium di Norcia. ❚
Christian Romanini
