La ARLeF e domande ae UE di di ripristinâ i finanziaments pes minorancis linguistichis
Ancje la ARLeF – Agjenzie regjonâl pe lenghe furlane e jere presinte te ultime sentade plenarie dal Intergrup european “Minorancis tradizionâls, comunitâts nazionâls e lenghis” dal Parlament european. In graciis di chest, pe prime volte, il furlan, adun cun altris minorancis linguistichis, al à podût contâ ce che al è stât fat, a nivel locâl, pe tutele de sô minorance linguistiche e puartâ lis propriis istancis in Europe.
◆ Vie pal incuintri fat a Strasburc e promovût de europarlamentâr furlane Elena Lizzi, al à partecipât, in videoconference, il president de ARLeF, Eros Cisilino, che al à fevelât di ce che la Regjon Autonome Friûl-Vignesie Julie e à fat pe promozion de lenghe furlane. Cun di plui, al à sclarît la situazion gjenerâl e la grande particolaritât dal Friûl, che al pues svantâ une coesistence secolâr, ancjemò vive, des trê fameis linguistichis plui grandis dal nestri continent – chê latine (cul furlan e talian), chê gjermaniche (cul todesc e cu lis comunitâts gjermanofonis) e chê slave (cul sloven).
◆ Ma soredut, il president al à podût fâ domandis impuartantis denant dai parlamentârs che a rapresentin lis diviersis minorancis storichis de UE: «Di agns o domandìn la istituzion di une agjenzie europeane pes lenghis minoritariis che e sedi buine di capî lis tantis dibisugnis de popolazion europeane e che e rivi a dâ rispuestis valevulis, vint ancje une rapresentance primarie intes sedis di guvier plui altis. Di timp il Friûl si à candidât a dâ acet a cheste Agjenzie, pal fat di jessi di simpri il cûr linguistic de Europe. Cheste domande no je un mateç, ma une esigjence reâl che aromai no si pues fâ plui di mancul, come che nus à dimostrât a clâr il Minority Safe Pack, une iniziative che e je rivade a cjapâ sù milions di adesions par domandâ un ricognossiment plui fuart pe tutele des lenghis minoritariis. Dongje di chest, o domandìn di ripristinâ i fonts economics a pro des minorancis, che a son stâts abolîts cirche 20 agns indaûr. La Union Europeane, che e fâs invistiments di miliarts di euros in setôrs che dispès a lenzin lis sôs competencis, e varès di invistî ancje su lis minorancis, tuteladis intai siei tratâts. Chest al darès plui fuarce ae unitât continentâl, creant lis cundizions par une miôr coesion tra i Stâts membris. Cun di plui – al à sierât Cisilino –, o domandìn che chescj fonts a vedin une distribuzion che e favorissi lis minorancis no transfrontalieris, che a àn plui dificoltât a fâ front denant de pression linguistiche des lenghis maioritariis». Un intervent che al à ben contentât il president dal Intergrup Lóránt Vincze, che al à dit di sintîsi dongje des propuestis.
◆ In ocasion de riunion – là che a àn partecipât ancje Mauro Missana di Radio Onde Furlane e Rossano Cattivello dal setemanâl in lenghe furlane “La Vôs dai furlans” – il president al à ancje podût rispuindi a cualchi domande su la cundizion de lenghe furlane intal sisteme scolastic. ❚
