La lenghe furlane e à i siei prins esperts “certificâts”, cun certificazion formâl e uficiâl. Lunis ai 9 di Otubar stâts a Udin e je stade fate la consegne dai atestâts che a ricognossin che chei che a àn frecuentât cun sucès, dopo vê passât l’esam finâl, il cors di formazion specific inmaneât dal CIRF de Universitât dal Friûl, a àn lis cognossincis e lis competencis tal ûs dal furlan che a corispuindin al nivel C2 (chel plui alt) dal Cuadri comun european di riferiment. La iniziative formative – un cors di cincuante oris in dôs butadis, frecuentât in dut di une cincuantine di lôr – e je stade metude adun cul jutori finanziari de ARLeF e si pues calcolâle tant che l’inviament de metude in vore di chê norme strategjiche, che si cjate inte leç regjonâl 29/2007 in cont de promozion de lenghe furlane, che e tocje juste la certificazion linguistiche.
◆ La consegne dai atestâts e rapresente ancje la conclusion formâl di un percors formatîf e l’inviâsi di une gnove stagjon pe lenghe furlane e pai dirits linguistics, cemût che a àn marcât intai lôr intervents inte aule 3 dal Centri economic e juridic dal Ateneu il diretôr dal CIRF e delegât dal Retôr pe lenghe furlane, Enrico Peterlunger, e la conseire dal Comun di Udin e delegade dal Sindic pe identitât furlane e pal plurilinguisim, Stefania Garlatti Costa. Il diretôr de ARLeF, William Cisilino, ancje lui presint in ocasion de consegne dai atestâts, al à ricuardât che «chei che a àn vût chest ricognossiment a vignaran clamâts de Agjenzie tant che certificadôrs intes comissions di esam che a varan di valutâ e di ricognossi i diviers nivei di cognossince e competence linguistiche» e al à zontât che «la ARLeF e je daûr a meti adun il regolament che al permetarà di dâ valôr a chestis professionalitâts e di disvilupâ chest percors, che al è une vore impuartant par incressi la presince e l’ûs dal furlan in ducj i cjamps, tacant di chei de istruzion e de aministrazion publiche». ❚
Certificazion linguistiche pal furlan, consegnâts i prins atestâts di nivel C2
Marco Stolfo