Cecot in Cjamp? La rivoluzion di Lui

La gnove e je di chês che a fasin scjas: Sergio Cecotti al è disponibil a cori pes regjonâls dal an che al ven. Al à spietât fintremai ai 14 di Lui, inovâl dal atac ae Bastilie di Parîs, par proponi une operazion che e sarès pardabon rivoluzionarie: vuidâ une coalizion teritoriâl che e ledi a meti dongje i autonomiscj e ducj chei che a àn voie di ricostruî des fondis la coesion istituzionâl in cheste Regjon. Une Regjon mâl nassude e mâl sestade, ma che in chest moment e je sot atac di bande dal centralisim roman e des ambizions macroregjonâls dal Venit. President de Regjon par un an (1996) e sindic di Udin dal 1998 al 2008 in chê che e je stade la ultime esperience autonomiste di guvier locâl, il fisic teoric al è forsit l’unic om che al à avonde carisme e vision par vuidâ la Regjon fûr dal palût dulà che “i doi renzisims” (chel di Matteo Renzi ma ancje chel di Renzo Tondo, al dîs Cecotti) a àn sburtade la nestre tiere. Almancul chest a sperin chei di chenti che a lavorin par une fuarce politiche gnove.
Che alc di gnûf al fos daûr a boli inte cite dal panorame politic furlan lu vin plui voltis sclarît su lis pagjinis di chest gjornâl, che al nassè tal 1946 propit par pandi la necessitât di meti dongje autonomie e identitât in cheste clâf: Josef Marchet lu diseve za in chê volte, ma in 70 agns o sin ancjemò daûr a cirî une rapresentance politiche buine di fâ pesâ i interès dai furlans cuintri chei di Rome. Intai ultins doi trê agns, in tancj aministradôrs locâi e je cressude la cussience di scugnî meti dongje une alternative dal bas a un sisteme dai partîts che nol rispuint plui aes dibisugnis de int ma dome a une logjiche autoreferenziâl.
In timp pes votazions, al è saltât fûr il leader che al podarès fâ di clocje a chest progjet. Drete e çampe a àn pôre de sô autorevolece, e lui al à za declarât che “il Pd al è daûr a murî”. Tancj consens di int che e veve crodût intal dogme renzian de rotamazion a tornin disponibii e al covente convinci i furlans (e i triestins) a fidâsi di un dissen alternatîf. Isal avonde timp? Ise la fuarce par fâlu? Dome il timp nus al disarà. Dome une robe invezit e je sigure: e je une grande bisugne e forsit e je la ultime ocasion par imbastî un sogjet politic fuart che finalmentri al sedi dome a pro dai interès de nestre int.
✒ Walter Tomada