Il secul XV al rapresente ce che i storics a definissin tant che une cerniere jenfri dôs etis: chê di Mieç, universalistiche, peade ai doi grancj podês dal Pape e dal Imperadôr, e chê Moderne, caraterizade dai stâts nazionâi. In veretât, il passaç che al segne la fin de Ete di Mieç al è lunc e complicât. La universalitât che e à caraterizât il timp dai Papis a dai Imperadôrs si compromet cu la grande division tacade intal 1377 e cognossude tant che il Grant Schisme di Ocident.
La corone di France, che e controlarà la sede papâl di Avignon, e devente cussì cetant potente, dominant sot dai Angjoins il Misdì de penisule taliane e ancje une buine part de Bosgne, fasint vignî in incà, in rivalitât cun Vignesie e vie pai trois balcanics, tiessûts di sede, pelicis, arint, pieris preziosis, ma ancje ideis, come che o disarìn in curt. Cheste gnove mape gjeopolitiche no dome e fâs formâ une bipolaritât impuartante jenfri il vecjo Sacri Roman Imperi Gjermanic di une bande e i gnûfs pretendents ae supremazie dal Ocident di chê altre – ven a stâi France, Spagne e Ingletiere – ma e stice ancje une continue vuere globâl, come che si le definirès in dì di vuê, che e contribuìs a blocâ pe prime volte in plui di mil agns une cressite demografiche continue. Une vuere che pe plui part si zuie vie pe Italie, là che Angjoins e Aragonês si contindaran, sul cuarp muart de utopie federiciane (l’Imperadôr Fidrì II di Svevie), il control dal belancin politic internazionâl. E chest al compromet ancjemò di plui une situazion cetant confusionade e complicade, là che il Ducât di Milan, i siôrs di Mantue e di Ferare, i de’ Medici in Toscane e i doi Papis (chel di Rome e chel di Avignon) a tacaran a polarizâsi par une o par chê altre bandiere, cirint ognidun di supâ il plui pussibil par vuadagnâ dut ce che a podaran gafâ intune cundizion di confusion totâl. Esercits di mercenaris a passin dilunc savoltant la tiere, robant, copant e brusant. Cui esercits armâts che a traviersin lis regjons de Europe – ma ancje a bon pro dal gnûf puint Angjoin che al unìs forsit pe prime volte dopo tancj secui l’Orient e l’Ocident dal continent – a viazin ancje lis gnovis ideis, simpri plui libaris dal control istituzionâl, dal moment che Tron e Crôs a son masse impegnâts a scombatisi fra di lôr par podê permetisi il lus di tignî dut sot control. Al sarà duncje il ‘400 il secul di formis gnovis di eresie, un discors bon par une altre pontade. Il filon in cuintritindince al tache adore però, adiriture intal 1347, cu la tremende Peste Nere: une pandemie che e çoncje une cressite demografiche mai declinade dal Mil, fin cuant che une nâf partide di Caffa, in Crimee, plene di forment e di pantianis (ponticanis, a disevin i antîcs, ven a stâi surîs dal Pontus, il Mâr Neri) e dal dut infetade dal mâl, e fasè il zîr di dut il Mediterani, pandint cussì la sô cjarie di muart. Une sensazion che intai nestris dîs si torne, magari cussì no, in cualchi maniere a vivi di gnûf, par colpe di chel virus che al puarte il non di Corone. ❚
