Il festival che al met in rêt midiant de musiche Cjargne, Valcjanâl e Cjanâl dal Fier
A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant imitade. Sul imprin, la manifestazion ideade dal clarinetist Claudio Mansutti che le vuide inmò cumò dentri de Fondazion Luigi Bon, e faseve juste trê, cuatri concierts, e la rispueste no jere cuissà ce grandonone, pûr proponint apontaments di un ciert nivel. Cul lâ dai agns però, bielzà te seconde, tierce edizion, si à intivât un interès simpri plui grant di bande de int, sedi dal lûc che dai forescj, tant che cumò Carniarmonie al è un event slargjât e cetant partecipât che nol pues mancjâ tes iniziativis culturâls dal Istât in Friûl. E je rivade a fâ cincuante e plui apontaments di Lui fin in Setembar, tirant dentri in pratiche ducj i comuns de Cjargne, ma ancje de Valcjanâl e dal Cjanâl dal Fier, vantant colaborazions cun associazions culturâls internazionâls e ospitant personalitâts musicâls di grande nomee.
◆ In cheste edizion numar trentedoi, a son trentesîs i concierts tal vivarôs cartelon, che si davuelzin di ca e di là dal Friûl de Alte, ospitâts in comuns, frazions, borgadis, dentri di plêfs, museus, glesiis, palaçs, auditoriums, teatris, tal vert dai prâts. Di fâ tindince: e di fat cumò a son tantis, forsit masse, lis iniziativis che a àn cjapât ispirazion di Carniarmonie e che si davuelzin simpri di Istât, magari in chei stes lûcs che a son stâts screâts pe prime volte propit di Carniarmonie. Un copie e incole che no sai ce tant ben che al pues fâ, parcè che cumò la programazion dai events si è intasade, tant che intune stesse dì, inte stesse ore, magari intes frazions dai stes comun, a son doi o trê apontaments. Un ben o un mâl? Considerant che finît l’Istât al è dificil che al sucedi alc di interessant dal pont di viste culturâl intes zonis altis – parcè che e je vere che di Atom e di Invier pôc al passe – forsit al sarès miôr che i ents promotôrs si fevelassin par modulâ lis iniziativis in maniere virtuose e no dispetose.
◆ Dut câs, Carniarmonie e reste il riferiment de musiche in Cjargne e intai Cjanâi dongje par dute la biele stagjon. Il festival al è tacât ai 2 di Lui inte plêf di Castoie di Soclêf cul famôs violoncelist Mario Brunello, insiemi cu la Orchestre Sinfoniche Regjonâl: un grant sucès. Al è lât indevant dut il mês contant tredis concierts, e cumò dilunc di Avost a ‘nd è altris vincjeun, plui altris doi ai prins di Setembar.
◆ Ospits musiciscj innomenâts, orchestris, soliscj, grups di varis struments e vôs dal Friûl, di Italie e dal mont, cui repertoris plui diferents che a van de musiche antighe ae classiche, ae contemporanie, al jazz, aes musichis dal mont. Inte programazion grandonone o vin gust di ricuardâ i apontaments indulà che a saran ospitadis formazions nestris, stant che Carniarmonie e à vût di simpri une atenzion particolâr pai talents locâi.
◆ Sabide ai 5 di Avost, inte Sala Azzurra di For Disot, e je ospite la violiniste udinese che cumò e vîf a New York, Ludovica Burtone. E sarà insiemi cuntun tercet componût dai furlans Emanuele Filippi al pianoforte, Alessio Zoratto al cuintribàs e Luca Colussi ae baterie, cun composizions de stesse Ludovica, che e à di pôc realizât il so prin disc dal titul “Sparks”: al sarà un event in colaborazion cun Ert dal Friûl-Vignesie Julie.
◆ Lunis ai 7 di Avost, la FVG Orchestra e sarà tal Teatri Candoni di Tumieç cul pianist Antonio di Cristofano e il diretôr Vito Clemente, cuntun conciert dal titul “Amadeus”, dedicât al gjeni di Salisburc. Il pianist pordenonês Roberto Turrin al sarà la dì dopo, martars ai 8 di Avost, inte glesie di Sant Zuan a Lungjis di Soclêf par un conciert intitulât “Piano Music & Movies”. Ai 9 tal centi culturâl “Rozajanska kulturska hiša” di Prât di Resie, i trê armoniciscj – ma dome i prins doi furlans – Adolfo Dal Cont, Andrea Nassivera e Diego Borghese a saran protagoniscj de serade “Dal Baroc ae musiche dal nestri timp”. E je grande spiete pal conciert di presentazion dal cd “Trente” de storiche formazion furlane FLK, sabide ai 12 di Avost a Vile di Verzegnis, in colaborazion cun Radio Ode Furlane, V/L mont, la associazion culturâl Giorgio Ferigo e Artetica. Biele ancje la iniziative “Dopo Messa” che ai 13 e ai 20 di Avost, subit dopo de messe a Damâr e Liariis, e permet di fâ sintî i orghins di chei lûcs graciis ai organiscj Francesco Cardelli e Gianmaria Paschini.
◆ Ai 15 di Avost a Sauris Disot al è il duet di zovins di talent Enrico Leonarduzzi e Sebastiano Gubian, sax e pianoforte; invezit, in colaborazion cu lis realtâts furlanis “Risonanze” e “Barocco Europeo”, sabide ai 19 di Avost a Malborghet e Valbrune, al va in sene un spetacul sul cjacarât compositôr, amadôr e omicide, Alessandro Stradella. Par sierâ il mês di Avost, ai 20, a Dimpeç al sarà protagonist il grup furlan Harmony Gospel Singer, direzût di Stefania Mauro. Par ce che al tocje i doi concierts di Setembar, un al è ai 2 cul tercet furlan formât di Federico Martinello al clarin, Pierluigi Rojatti al violoncel e Elisabetta Chiarato al pianoforte, e ai 3, a Dimplan – insiemi cul cuartet de Cechie Apollon Cuartet che al è in residence in Cjargne – a saran la pianiste Federica Repini e il clarinetist Claudio Mansutti.
◆ Insome, ancje chest an Carniarmonie si dimostre une rassegne cuntun grant voli, e dôs orelis, di rivuart pai musiciscj, e ancje pes musichis, dal Friûl. Dutis lis informazions sui lûcs, sui programs e sui ospits a son sul sît carniarmonie.it e su lis pagjinis socials dal festival storic de mont furlane. ❚
